Aqmolada robot qurastyratyn oqýshylar arasynda baıqaý ótti
KÓKShETAÝ. QazAqparat - Kókshetaýda kolledj jáne mektep oqýshylary arasynda «AQMOLA Robotics Challenge» atty 2-shi oblystyq robot tehnıkasyna qatysty baıqaýy ótti, dep habarlaıdy QazAqparat tilshisi.
Jasóspirimderdiń shyǵarmashylyq belsendilikterin arttyrý, bilim salasyndaǵy robotehnıkany nasıhattaý maqsatynda uıymdastyrylǵan baıqaýǵa 11 men 17 jas aralyǵyndaǵy 160-tan astam úmitker qatysty. Oblystyq bilim basqarmasynyń bólim basshysy Ásemgúl Súleımenovanyń sózinshe, búgingi tańda óńirde shamamen 119-ǵa jýyq robototehnıka synyptary jumys isteıdi.
Innovatsııalyq ıdeıalar baıqaýynyń nátıjesi boıynsha mektep oqýshylary arasynda birinshi oryndy Kókshetaý qalasyndaǵy «Robotrek» klýbynyń «Robotrek» komandasy ıelendi. Al, kolledjdiń bilim alýshylary arasynda birinshi orynǵa Stepnogorsk qalasyndaǵy №2 Indýstrııaldyq-tehnıkalyq kolledjiniń komandasy laıyq dep tanyldy.
Baıqaý jeńimpazdaryn Aqmola oblysy ákiminiń orynbasary Aına Mysyrálimova quttyqtady.
«Ótken jylǵy baıqaýmen salystyrǵanda bıyl qatysýshylardyń sany eki esege kóbeıgeni jastarymyzdyń robototehnıkaǵa degen qyzyǵýshylyǵy artyp kele jatqanyn kórsetedi. Jýyrda ǵana biz Astanadaǵy EKSPO qalashyǵymen memorandýmǵa otyrdyq. Bizdiń aqmolalyq oqýshylar basqa oblystardyń jas zertteýshilerimen tájirıbe almasýy úshin kelesi baıqaýymyzdy osy EKSPO qalashyǵynda ótkizýge usynys bildirgim keledi», - dedi oblys ákiminiń orynbasary. 
