Aqmolada «Recommended by Visit Aqmola» júıesi engizilýde
KÓKShETAÝ. QazAqparat - Aqmola oblysynda «Recommended by Visit Aqmola» sapa belgisin taǵaıyndaý júıesi engizilýde, dep habarlaıdy QazAqparat tilshisi.
«Visit Aqmola» týrıstik aqparattyq ortalyǵynyń málimetine qaraǵanda, «Aqmola Tourism Awards» óńirlik syılyǵynda júldeli oryn alǵan «Krýız», «ıAssaýı», «Amega týr» týrıstik fırmalary, «Rixos Borovoe», «Aurora Garden», «Park House» otelderi, «Zeren týr», «Beıbarys», «Elikti Park» demalý ortalyqtary, «Oqjetpes» emdeý-saýyqtyrý ortalyǵy, «Almaz», «Zelenyı bor» shıpajaıy jáne «Býrabaı Damý» seriktestigi osy «Recommended by Visit Aqmola» sapa belgisine ıe boldy.
Álemdik tájirıbe kórsetkendeı bul sapa belgisin taǵaıyndaý týrıstik nysandar usynatyn qyzmet sapasyn arttyrýǵa múmkindik beredi. Máselen, Frantsııa úkimeti «Qualité tourism» nemese «Kachestvennyı týrızm» sapa belgisin taǵaıyndady. Bul marka qonaqtar úshin eń úzdik týrıstik qyzmetterdi biriktirip, tańdaıdy. Munda otelder, týrıstik apartamentter, týrıstik aýyldar, kempıng, meıramhana, dámhana, týrıstik agenttikter men keńseler, mádenı jáne tabıǵı kórikti oryndarynyń qyzmetteri usynylǵan.
«Qualité tourism» markasy bul ár týrıst sene alatyn, sapaly qyzmetter usynatyn týrıstik mekemelerdiń belgisi bolady. Markanyń basty qundylyǵy joǵary deńgeıdegi qyzmet sapasy, qyzmetkerlerdiń kásibıligi men quzyrettiligi bolyp tabylady», - deıdi vedomstvodan.
Al, Ispanııadaǵy «Q» sapa belgisi servıs, qyzmet, qaýipsizdik jáne kásibıliktiń eń joǵary deńgeıine kepildik bere alady. Bul belgini alý úshin týrızm salasynda qyzmet isteıtin fırmaǵa halyqaralyq naryqta Ispanııany usyna alatynyn dáleldeýi kerek.
«Q» belgisi - bul joǵary sapa usynatyn brend. Muny joǵary sapa standartyna jaýap bere alatyn týrıstik uıymdarǵa ICTE (El Instituto para la Calidad Turística Española) táýelsiz agenttigi taǵaıyndaıdy.
Qazirgi kezde, Katalonııada 400 jýyq oryn «Q» belgisin alǵan», dep tolyqtyrdy «Visit Aqmola» týrıstik aqparattyq ortalyǵy.
Aıta ketý kerek, ıspanııanyń «Q» sapa belgisin taǵaıyndaý júıesin Qazaqstanǵa da engizý josparda bar. Pılottyq joba erikti túrdi Astana, Almaty qalalary jáne Almaty oblystarynda júzege asyrylmaqshy.
Aqmola oblysy ákiminiń orynbasary Marat Iǵalıevtyń aıtýynsha, ózge óńirlerde bul pılottyq jobaǵa qosylýyna bolady.
