Aqmolada páterge «bomba qoıyldy» dep polıtsııaǵa jalǵan habar bergen adam sottaldy

KÓKShETAÝ. QazAqparat - Aqmola oblysynyń Stepnogorsk qalalyq sotynda terrorızm aktisiniń daıyndalyp jatqany týraly jalǵan habarlama berip, qylmystyq quqyq buzýshylyq jasaǵan azamat K-ǵa qatysty qylmystyq is qaraldy, dep habarlaıdy QazAqparat tilshisi oblystyq sottyń baspasóz qyzmetine silteme jasap.

Vedomstvonyń málimetishe, azamat K. Mas kúıde bola tura, 102 telefon nómirine qońyraý shalyp páterde jarylǵysh qurylǵynyń ornatylǵany týraly habarlaǵan.

Daıyndalyp jatqan jalǵan terrorızm aktisi habarlamasynyń kesirinen qoǵamdyq qaýipsizdik buzyldy. Tıisti qyzmetter oqıǵa ornyna shuǵyl attandyrylǵan. Olar esh negizsiz bireýdiń jalǵan aqparaty saldarynan materıaldyq shyǵynǵa ushyrady.

«Stepnogorsk qalalyq sotynyń úkimimen azamat K. qylmystyq quqyq buzýshylyq jasaǵany úshin kináli dep tanylyp, oǵan 2 jylǵa bas bostandyǵyn shekteý jazasy taǵaıyndaldy», delingen habarlamada.