Aqmolada pánaralyq olımpıadanyń oblystyq kezeńiniń jeńimpazdary anyqtaldy
KÓKShETAÝ. QazAqparat – Aqmola oblysynda jalpy bilim beretin pánder boıynsha respýblıkalyq olımpıadanyń oblystyq kezeńi ótti, dep habarlaıdy QazAqparat tilshisi.
Oblystyq bilim basqarmasynyń málimetinshe, olımpıada Kókshetaý qalasyndaǵy S.Júnisov atyndaǵy №18 orta mektep-lıtseıde ótti. Oǵan 9-11 synypta oqıtyn 400-den astam oqýshy qatysty.
«Olımpıada qazaq tili men ádebıeti, orys mektepterindegi qazaq tili, orys tili men ádebıeti, qazaq mektepterindegi orys tili, Qazaqstan tarıhy, aǵylshyn tili, nemis tili, frantsýz tili, matematıka, ınformatıka, fızıka, hımııa, bıologııa, geografııa, «Adam.Qoǵam.Quqyq» pánderi boıynsha ótti. Olımpıada qorytyndysyna sáıkes «Úzdik komanda-2020» atalymy boıynsha 1-shi orynǵa «Bilim-ınnovatsııa» lıtseı ınternaty ıe bolsa, 2-shi orynǵa Kókshetaý qalasy, 3-shi orynǵa Kókshetaýdaǵy daryndy balalarǵa arnalǵan oblystyq mamandandyrylǵan mektep-ınternaty laıyq dep tynyldy.
Sonymen qatar, 32 oqýshy altyn medal, 33 oqýshy kúmis jáne 94 oqýshy qola medal ıegeri atandy. Birinshi jáne ekinshi oryn alǵandar naýryz aıynda Taldyqorǵan jáne Qaraǵandy qalalarynda ótetin respýblıkalyq kezeńde baq synaıtyn bolady», - deıdi bilim basqarmasynyń baspasóz qyzmetindegider.
Olımpıadanyń negizgi maqsaty – ǵylymı bilimdi nasıhattaý jáne oqýshylardyń ǵylymı qyzmetke qyzyǵýshylyǵyn damytý, daryndy balalardy anyqtaý úshin qajetti jaǵdaı týdyrý, halyqaralyq olımpıadalarǵa qatysatyn oqýshylardy irikteý jáne daıarlaý.
