Aqmolada ótken Prezıdent shyrshasyna 200-ge jýyq bala qatysty
KÓKShETAÝ. QazAqparat - Aqmola oblysynda 200-ge jýyq balanyń qatysýymen QR Prezıdentniń Jańa jyldyq shyrshasy ótti, dep habarlaıdy QazAqparat tilshisi.
Kókshetaýda «Biz elimizdiń jarqyn bolashaǵymyz!» taqyrybymen uıymdastyrylǵan shyrshaǵa oblystaǵy 17 aýdan men 2 qaladan, balalar úıinen, 4 oblystyq arnaıy túzetý mektep-ınternatynan, daryndy balalarǵa arnalǵan 3 oblystyq arnaıy mektep-ınternatynan, jasóspirimderdi ońaltý jáne áleýmettik beıimdeý oblystyq ortalyǵynan, múgedek balalardy qoldaý qaýymdastyǵynan oqý úzdikteri, jetim balalar jáne ata-ana qamqorlyǵynsyz qalǵan balalar, múgedek balalar, az qamtylǵan jáne kópbalaly otbasylardyń 9-13 jas aralyǵyndaǵy 200-ge jýyq bala qatysty.
Merekelik shyrsha barysynda «Sálem, Jańa jyl!» atty jańajyldyq teatrlanǵan kórinis qoıyldy.
Sharaǵa Aqmola oblysynyń ákimi Ermek Marjyqpaev qatysyp, balalardy quttyqtady.
«Memleket basshysy Qasym-Jomart Kemeluly Toqaev «Jas urpaq Qazaqstannyń damýynda sheshýshi ról atqarady jáne progrestiń qozǵaýshy kúshi bolyp tabylady. Meniń mindetim – senderdiń armandaryndy júzege asyrý jáne jeke tabys tarıhyn jasaý úshin barlyq múmkindikter men jaǵdaı jasaý» degen bolatyn. Aqmola oblysynda talantty, shyǵarmashylyq jáne belsendi balalar, naǵyz patrıottar óte kóp. Olardyń kópshiligi ártúrli jarystarda, olımpıadalarda jáne konkýrstarda óńirdi laıyqty kórsetip, joǵary nátıjeler men marapattarǵa qol jetkizýde. Búgingi shyrsha merekesi men syı-sııapat senderdiń kóńilderińnen shyǵady dep úmittenemin», - dedi oblys ákimi óz sózinde.
Osylaısha, Jańa jyldyq shyrshanyń ertegilik kórinisi tátti ústelmen jáne baǵaly syılyqtaryn tapsyrýmen aıaqtalady.
Eske sala keteıik, sonymen qatar Kókshetaýda erekshe kútimdi talap etetin balalardyń Jańa jyldyq shyrshasy ótti.
«Aqmola oblysynyń isker áıelderi qaýymdastyǵy» jáne «Kókshetaý» arnaıy olımpıada» qoǵamdyq birlestikteri birlesip, uıymdastyrǵan merekelik sharaǵa 70 bala men olardyń ata-analary qatysty.
