Aqmolada orman órtimen ondaǵan adam men tehnıka kúresip jatyr
ASTANA. KAZINFORM — 2026 jylǵy 8 qyrkúıekte Aqmola oblysyndaǵy «Otradnenskoe» KMM-niń Aqbulaq ormanshylyǵy aýmaǵynda orman órti tirkeldi.
Ekologııa jáne tabıǵı resýrstar mınıstrliginiń habarlaýynsha, órt oshaǵy ýaqytyly anyqtalyp, ony sóndirýge qajetti kúshter men tehnıka jedel jumyldyrylǵan. Qazir mamandar órtti oqshaýlap, tolyq sóndirý jumystaryn júrgizip jatyr.
— Órtpen kúreske memlekettik orman kúzetiniń 6 tehnıkasy men 13 qyzmetkeri, sondaı-aq «Qazavıaormanqorǵaý» RMQK-nyń 4 áýe desantshysy jáne sý tógetin qurylǵymen jabdyqtalǵan bir tikushaq tartyldy, — delingen vedomstvonyń baspasóz qyzmeti taratqan habarlamada.
Qosymsha kúsh retinde oqıǵa ornyna memlekettik orman kúzetiniń taǵy 4 tehnıkasy, Tótenshe jaǵdaılar departamentiniń 8 tehnıkasy men 21 qyzmetkeri, sondaı-aq sý tógetin qurylǵymen jabdyqtalǵan Mı-8 tikushaǵy jiberilip jatyr.
Mınıstrlik ókilderiniń málimetinshe, órttiń der kezinde anyqtalýy men orman kúzetiniń jedel áreketi qajetti kúshterdi oqıǵa ornyna ýaqytyly jetkizýge múmkindik bergen.
Eske salaıyq, 7 qyrkúıekte elimizdiń memlekettik orman qory aýmaǵynda tórt orman órti tirkelgenin habarlaǵanbyz.
