Aqmola oblysyndaǵy Chaglınka stantsııasyna medıtsınalyq poıyz keldi

ASTANA. KAZINFORM – Búgin Aqmola oblysynyń Chaglınka stantsııasyna «Salamatty Qazaqstan» medıtsınalyq poıyzy kelip jetti. Bul – aýyl jáne oǵan jaqyn eldi meken turǵyndaryna tegin tekserý, keńes berý jáne dıagnostıkalyq qyzmet kórsetetin naǵyz jyljymaly klınıkaǵa aınaldy.

Joba Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııasynyń, Densaýlyq saqtaý mınıstrliginiń jáne «Samuryq-Qazyna» AQ-nyń qoldaýymen júzege asyrylyp otyr. Birneshe kún ishinde poıyz óńirdiń alty eldi mekeninde bolyp, odan keıin Pavlodar jáne Shyǵys Qazaqstan oblystaryna attanady.

– Aýyl turǵyndaryn negizgi jáne tar beıindi baǵyttar boıynsha 29 maman qabyldaýǵa daıyn. Terapııa men hırýrgııadan bastap kardıologııa, oftalmologııa, ýrologııa, psıhologııa jáne basqa da salalar qamtylǵan. Poıyzda ÝDZ, EKG, flıýorografııa, gastrofıbroskopııa jasatýǵa, zerthanalyq taldaýlar tapsyrýǵa bolady. Qajet bolsa, shaǵyn hırýrgııalyq operatsııalar jasaımyz, al kúrdeli jaǵdaılarda – portalǵa qoıyp, eldiń úzdik klınıkalaryna joldaımyz. Azamattyǵy joq adamdardy da qabyldaımyz, - dedi poıyzdyń aǵa dárigeri Elnur Mahanov.

Zamanaýı jabdyqtar patsıentterdi ornynda-aq tolyq tekserýge múmkindik beredi, qalaǵa barýdyń qajeti joq. Barlyq sanıtarlyq jáne tehnıkalyq talap saqtalǵan, al qozǵalysy shekteýli jandar úshin qolaıly jaǵdaılar jasalǵan.

Dárigerlerden bólek, poıyz quramynda Ulttyq komıssııa jibergen zańgerler men medıatorlar da bar. Olar eńbek daýlaryn sheshýge, áleýmettik tólemderdi rásimdeýge, sot jáne quqyqtyq rásimder boıynsha túsindirý jumystaryn júrgizýge kómektesedi.

Aýyl turǵyndary poıyzdyń keletinin aldyn ala bilip, otbasymen jınalyp keldi.

– Anam habarlandyrýdy kórip, mindetti túrde barý kerek dedi. Jasy kelgen, júregi mazalaıdy. Munda bir jerde EKG de, ÝDZ de jasap, keńes berdi. Bári tez ári yńǵaıly. Qalaǵa jıi bara almaıtyndar úshin bul – naǵyz múmkindik, - dedi Nazgúl Zakırıanova.

Chaglınkadan keıin medıtsınalyq poıyz 20–21 tamyzda Qyzyl tý aýylyna, 22 tamyzda Makınsk qalasyna, 23 tamyzda Qazaq aýylyna jáne 26–27 tamyzda Óleńti kentine barady.