Aqmolada múgedek jolaýshy taksısti tonap ketti
KÓKShETAÝ. QazAqparat - Aqmola oblysynda taksı júrgizýshisiniń aqshasyn úptep ketken múgedek er adam ustaldy, dep habarlaıdy QazAqparat tilshisi.
ІІD baspasóz qyzmetiniń málimeti boıynsha, aǵymdaǵy jylǵy 15 tamyzynda Býrabaı ІІB kezekshilik bólimine 62 jastaǵy taksı júrgizýshisi aryzdanǵan. Aryzdanýshynyń sózinshe, kóligimen júrip kele jatqan ony jol shetinde turǵan beıtanys múgedek er adam toqtatqan. Keıin er adamdy otyrǵyzyp alyp dittegen jerine tegin jetkizip salmaq bolǵan. Alaıda, júrgizýshi jol boıyndaǵy janar-jaǵar maı quıý stansasyna aıaldap, kóliginen shyǵady. Sol sátti kútkendeı jolaýshy júrgizýshiniń ámııany men uıaly telefonyn jymqyryp úlgeredi. 62 jastaǵy taksı júrgizýshisi ony baıqamaı kúdiktini aıtqan jerine jetkizip salady. Keıin úıine barǵanynda óziniń tonalǵanyn biraq biledi. Zardap shegýshi birden polıtsııaǵa habarlaıdy. Shyǵyn kólemi 205 000 teńgeni qurady.
«Jedel izdestirý sharasy barysynda tártip saqshylary Şýchınsk qalasynyń 38 jastaǵy turǵynyn anyqtap, qolǵa túsirdi», - dedi polıtseıler.
Qazirgi kezde kúdikti qylmysyn moıyndady, onyń ústinen QR QK 188-babynyń 1-bólimi boıynsha qylmystyq is qozǵaldy. Tergeý jumystary jalǵasýda.
