Aqmolada Memlekettik Tý bıikte jelbiredi
KÓKShETAÝ. KAZINFORM - Respýblıka kúni aıasynda Kókshetaý qalasyndaǵy «Týtuǵyr» monýmenti alańynda erekshe patrıottyq is-shara ótti. Saltanatty rásim barysynda Qazaqstan Respýblıkasynyń Memlekettik Týy kóterilip, elimizdiń Ánurany shyrqaldy.
Mereke qatysýshylary úshin bul kún el birligin, táýelsizdikti jáne qazaqstandyq patrıotızmdi aıshyqtaıtyn mańyzdy sát boldy.
Aqmola oblysynyń ákimi Marat Ahmetjanov óz quttyqtaý sózinde Respýblıka kúni – barsha qazaqstandyqtyń birliginiń, eldiń táýelsizdigi men azamattyq jaýapkershiliginiń sımvoly ekenin atap ótti.
– Elimiz baıandy, táýelsizdigimiz tuǵyrly bolyp, kók baıraǵymyz kókte máńgi jelbireı bersin! Respýblıka kúni qutty bolsyn, - dedi oblys ákimi.
Rásim barysynda óńirdiń áleýmettik-ekonomıkalyq damýyna úles qosqan azamattarǵa Alǵys hat tabystalyp, eńbek jolyn jańa bastaǵan jastarǵa estelik syılyqtar berildi.
Saltanatty jıynda sondaı-aq Aqmola oblystyq ardagerler keńesiniń tóraǵasy Ermek Nýǵyman men «Assambleıa jastary» RQB Aqmola oblystyq ókildiginiń tóraǵa orynbasary, ózbek etnomádenı ortalyǵynyń ókili Mahmýdjan Davranov sóz sóılep, el ishindegi beıbitshilik pen kelisimniń mańyzyn atap ótti.
Óńirdiń belsendi qoǵam qaıratkeri, Aqmola oblystyq máslıhatynyń depýtaty, Kókshetaý qalalyq emhanasynyń bas dárigeri Ǵalııa Sabataeva da aqmolalyqtardy merekemen quttyqtap, óz áserin bólisti.
– Barshańyzdy Respýblıka kúnimen shyn júrekten quttyqtaımyn! Búgin biz el bolǵanymyzǵa 35 jyl tolyp otyr. Aqmola oblysynyń ákimi Marat Muratulyna, qala ákimi Anýar Qaıyrgeldiulyna zor alǵysymdy bildirgim keledi. Bul isterge erekshe qýanyshtymyn jáne turǵyndarymyz da osy eńbekti kórip, baǵalap otyr dep oılaımyn! – dedi ol.
Іs-shara sońynda qatysýshylar «Qazaqstanym» ánin birge oryndap, merekelik kóńil kúımen tarqasty.
Memlekettik Tý kóterý rásimi óńir turǵyndarynyń elge degen súıispenshiligin arttyrǵan, ár býyndy táýelsiz Qazaqstannyń ortaq qundylyqtary tóńireginde biriktirgen mańyzdy oqıǵa boldy.
Aıta keteıik, búgin elimiz ulttyq mereke – Respýblıka kúnin atap ótedi. Osyǵan oraı respýblakanyń ekonomıkalyq hám saıası egemendikke qalaı qol jetkizgeni jaıynda Kazinform agenttigi sholýshysynyń materıalynan tanys bolyńyzdar.