Aqmolada memlekettik qyzmetterdiń 634 túri elektrondy formatqa aýystyryldy
«Kórsetiletin memqyzmetterdiń sapasyn arttyrý - departamenttiń basym baǵyttarynyń biri. Sońǵy birneshe jylda bul salada aıtarlyqtaı ózgerister oryn aldy. Áleýmettik mańyzy zor normatıvti quqyqtyq aktiler qabyldandy, memlekettik apparat qurylysyna ózgertýler engizildi. Búgingi tańda qyzmet berýshi men qyzmet alýshy arasynda baılanys azaıǵandyqtan jáne memlekettik kórsetiletin qyzmetterdiń kópshiligi elektrondy túrge aýystyrylǵandyqtan, elimizde turmystyq jemqorlyq 2-3 ese azaıdy» - deıdi Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqmola oblysy boıynsha departamenti basshysynyń orynbasary Darhan Haırýllın.
Vedomstvonyń aıtýynsha, ótken jyly Aqmola oblysynyń memlekettik organdary jáne ishki vedomstvolyq uıymdar 5 746 560 qyzmet kórsetti, onyń ishinde 3 757 858 qyzmet nemese 65,4 paıyzy jergilikti atqarý organdaryna, 1 988 702 qyzmet nemese 34,6 paıyzy ortalyq memlekettik organdardyń aımaqtyq bólimshelerine tıesili.
Osylaısha, memqyzmetterdiń 76,5 paıyzy elektrondy formatta kórsetilgen. Jalpy, qazirgi ýaqytta elektrondy úkimet arqyly 634 qyzmet pen servısterge qol jetkizildi, onyń ishinde 235 elektrondyq qyzmet pen «elektrondyq úkimet» servısteri, 80 elektrondyq lıtsenzııa, 51 eskertý jáne 268 elektrondyq ruqsattama bar.
«Eseptik kezeńde kóptegen nátıjelerge qol jetkizdik. Mysaly, 76 qyzmet boıynsha memlekettik qyzmetterdiń merzimderi qysqartylyp, talap etiletin qujattar tizimi azaıdy. Transporttyq quraldy tirkeýge elektrondy túrde ótinish berý múmkindigi jasaldy, resmı satýshylardan jańa kólik satyp alý barysynda kólikterdi tekserý joıyldy» - deıdi Darhan Haırýllın.
Sonymen qatar, balanyń týýyna baılanysty proaktıvti qyzmet iske qosylyp, ol azamattardyń HQO-na nemese portalǵa júginýiniń qajettiligin joıdy. Bul úrdis avtomatty túrde aqparattyq júıelermen árekettesý arqyly júzege asyrylady. Proaktıvti ádis arqyly shamamen 60 myń bala tirkeldi.
Budan bólek, jasy boıynsha zeınetaqy tólemderin taǵaıyndaý, Biryńǵaı jınaqtaýshy zeınetaqy qorynan memlekettik bazalyq zeınetaqy tólemderin taǵaıyndaý boıynsha keshendi qyzmet iske qosyldy. Buǵan deıin atalǵan qyzmetterdi alý úshin árbir qyzmet boıynsha ótinim qajet bolatyn. Endigi kezekte bir ret ótinim bildirip, ári qaraı árekettestik úrderisteri memorgandar men memlekettik korporatsııa tarapynan uıymdastyrylady.
