Aqmolada memlekettik qyzmettegi áıelderdiń 47 paıyzy basshylyq qyzmet atqarady
Bul jóninde búgin QR Memlekettik qyzmet isteri agenttiginiń Aqmola oblysy boıynsha departamenti memlekettik qyzmet basqarmasynyń basshysy Gúlmıra Evnıeva málim etti.
Onyń aıtýynsha, qazirgi ýaqytta oblys boıynsha 3 myńnan astam áıel memlekettik qyzmette óz mindetin sapaly atqaryp, elimizdiń damýyna úles qosyp keledi. Spıker óz baıandamasynda birqatar statıstıkalyq málimetterdi keltirdi.
« Qazirgi zamanǵy áıel - eldegi barlyq saıası jáne áleýmettik protsesterdiń tolyq quqyly jáne belsendi qatysýshysy. Genderlik saıasatqa qoldaý kórsetilip, áıelderdiń qoǵamnyń ár qyzmet salasynda tańdaý bostandyǵyn qamtamasyz etý úshin barlyq jaǵdaı jasalǵan. Mysaly oblystaǵy memlekettik qyzmetshilerdiń 65% - áıelder, al dálirek aıtsaq 5171 qyzmetshiniń 3352-si - arýlar. Bul kórsetkish Ekonomıkalyq yntymaqtastyq pen damý uıymyna kiretin kóptegen elderdiń, máselen Italııa, Belgııa men Ispanııanyń uqsas kórsetkishterinen artyq. Oblystaǵy memlekettik qyzmetshi áıelderdiń 47,3% basshylyq qyzmet atqarady. 2019 jyly bos laýazymdarǵa ornalasýǵa arnalǵan konkýrstarǵa eki myńǵa jýyq azamat qatysty, memlekettik qyzmetke úmitkerlerdiń 50,2% áıelder boldy. Konkýrs qorytyndysy boıynsha taǵaıyndalǵandardyń 53,6%-yn názik jandar quraıdy » - dep atap ótti G.Evnıeva.
Búgingi tańda memlekettik qyzmetshilerdiń damýyna, olardyń bilimin, qabileti men daǵdylaryn arttyrýǵa barlyq jaǵdaı jasalǵan, daıarlaý, qaıta daıarlaý jáne biliktilikti arttyrý ınstıtýttary jumys isteıdi. Máselen, KR Prezıdentiniń janyndaǵy Memlekettik basqarý akademııasynyń Aqmola oblystyq fılıaly genderlik saıasat taqyrybynda túrli semınarlar uıymdastyrdy.
Genderlik saıasat - qoǵamnyń damý deńgeıiniń basty kórsetkishteriniń biri. Memlekettik qyzmettegi áıelderdi qoldaýdyń myqty irgetasy 2006 jyly Genderlik saıasat strategııasyn qabyldaý sátinde qalanǵan bolatyn. Osy baǵyttaǵy saıasat kóptegen uıymdardyń jumyla árekettesýimen júzege asyrylýda.
« Búgingi kúni biz Qazaqstannyń 2030 jylǵa deıingi genderlik saıasatynyń tujyrymdamasyn iske asyryp jatyrmyz. Aldaǵy ýaqytta memlekettik apparatty, onyń ishindegi genderlik saıasatty damytýǵa baılanysty jumys jalǵasady » - dep qorytyndylady G.Evnıeva.
