Aqmolada memlekettik qyzmet kórsetýde 37 kásipkerdiń quqyǵy buzylǵan
KÓKShETAÝ. QazAqparat- Jyl basynan beri Aqmola oblysynda 37 kásipker memlekettik qyzmet kórsetýde quqyqtarynyń buzylǵandyǵy týraly shaǵym túsirgen, dep habarlaıdy QazAqparat tilshisi.
Bul týraly óńirlik kommýnıkatsııalar qyzmetinde QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqmola oblysy boıynsha departamenti memlekettik kórsetiletin qyzmetter basqarmasynyń basshysy Ádilbek Muhamedjanovtyń qatysýymen azamattardyń memlekettik qyzmet kórsetý barysyndaǵy buzylǵan quqyqtaryn qorǵaý taqyrybynda ótken brıfıngte aıtyldy.
Basqarma basshysynyń sózinshe, qyzmet alýshylardyń shaǵymdaryn qaraý departament qyzmetiniń basty baǵyttarynyń biri.
«Kásipkerler men ınvestorlardyń quqyqtaryn qorǵaý, ákimshilik kedergilerdi azaıtý jáne bıznes klımatty jaqsartý maqsatynda departament Aqmola oblysynyń kásipkerler palatasymen tyǵyz baılanys jasaýda» - deıdi Ádilbek Muhamedjanov.
Basqarma basshysy atap ótkendeı, ózara is-áreket quraldarynyń biri kásipkerlerdiń ótinishterin qaraý. 2019 jyldyń ótken kezeńinde departament 37 ótinishti qaraldy. Anyqtalǵan quqyq buzýshylyqtarǵa sáıkes buzylǵan quqyqtardy qorǵaý boıynsha sharalar qabyldanyp jatyr.
«Mysalǵa, kásipkerlerimizdiń bireýiniń ótinishin qaraý nátıjesinde agroónerkásip kesheni sýbektisine ınvestıtsııalyq salymdar boıynsha shyǵyndardy óteý úshin tıisti sýbsıdııalardyń tolyq mólsherde berilmegeni anyqtaldy» - deıdi Ádilbek Muhamedjanov.
Departamenttiń atalǵan máselege aralasýynan keıin ǵana kásipkerdiń ótinishi komıssııa otyrysynda qaıta qaralyp, oǵan tólenbegen qarajat tıisti mólsherde tólendi.
Sonymen qatar, departamentke Bazarbaı Áýbákirov esimdi jeke kásipker ótinim bildirip, jer telimin jalǵa alý merzimin uzartý barysynda týyndaǵan máselesimen bólisipti.
«Departament kásipkerge memlekettik qyzmetke qol jetkizý úshin ótinim jazýǵa konsýltatsııalyq kómek kórsetti. Sonymen qatar kásipkerdiń quqyqtary jer komıssııasy múshelerine túsindirilip, atalǵan komıssııa otyrysynyń nátıjesinde B.R.Áýbákirovke jer aımaǵyna ıe bolý quqyǵyn berýge usynym engizildi» - deıdi Ádilbek Muhamedjanov.
Osylaı departament kásipkerge zańnama sheńberinde jer telimin jalǵa berý quqyǵyn uzartý máselesin sheshýge kómek kórsetken.
Kásipker Bazarbaı Áýbákirovtyń aıtýynsha, kásipkerlerdiń kópshiligi óz quqyqtaryn tolyq bilmegendikten jáne olardy qorǵaý úshin tıisti zańnamalyq bilimi bolmaǵandyqtan birqatar máselelerge tap bolady. Alaıda osyndaı jaǵdaıda memlekettik kórsetiletin qyzmetter salasyndaǵy quzyretti mamandar kómekke kelip jatady.
Sonymen qatar Ádilbek Muhamedjanov memlekettik organdarǵa barmaı-aq kórsetiletin memlekettik qyzmetterge qol jetkizýdiń ádisteri jóninde aıtap ótti.
«Mysalǵa, @EgovKzBot - elektrondy úkimeti botynyń alǵashqy nusqasy jumysy iske qosylǵan. Búgingi tańda bot arqyly 20-dan astam qyzmetter men servısterge qol jetkizýge bolady. Botpen jumys isteý úshin eGov.kz tirkelip, uıaly telefon nómirin portaldaǵy profılmen baılanystyrý kerek» - deıdi spıker.
Jalpy Ádilbek Muhamedjanovtyń aıtýynsha, mekenjaı anyqtamasyna qosa jeke tulǵanyń jyljymaıtyn múlkiniń joqtyǵyn nemese sottalmaǵandyǵyn rastaıtyn anyqtamalarǵa qol jetkizý qyzmetteri de qazirgi tańda eń suranysqa ıe qyzmetter qatarynan tabylady.
