Aqmolada memqyzmetshiler arasynda oqyrmandar marafony bastaldy
KÓKShETAÝ. QazAqparat- Aqmola oblysynyń memlekettik qyzmetshileri arasynda «Umytylmas mura» atty oqyrmandar marafon bastaldy, dep habarlaıdy QazAqparat tilshisi QR Memlekettik qyzmet isteri ján sybaılas jemqorlyqqa qarsy kúres is-qımyl agenttiginiń Aqmola oblysy boıynsha departamentiniń baspasóz qyzmetine silteme jasap.
Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqmola oblysy boıynsha departamenti óńirdegi memlekettik qyzmetshilermen kezdesý barysynda eliktirgish «Umytylmas mura» atty oqyrmandar marafonyn bastady.
«Shara «Rýhanı jańǵyrý» baǵdarlamasynyń «Ózgeristerdi ózińnen basta» baǵdarlamasy sheńberinde iske asyrylýda. Ol memlekettik qyzmetshiler arasynda kórkem ádebıetterdi nasıhattaýǵa, olardyń qazaq halqynyń baı tarıhı jáne mádenı murasyna degen qyzyǵýshylyǵyn arttyrýǵa baǵyttalǵan.
Osyndaı tanymdyq marafondy bastaýdy departamenttiń oblystaǵy memlekettik qyzmetshilerdiń arasynda «Ózgeristerdi ózińnen basta» baǵdarlamasyn iske asyrý úshin jaýapty mamany Maral Atambaeva usynyp otyr», deıdi Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqmola oblysy boıynsha departamentiniń baspasóz-hatshysy Jazıra Toqtar.
Atalmysh marafondy júzege asyrý aıasynda departament barlyq memlekettik qyzmetshilerdi oǵan belsendi qatysýǵa shaqyrady. Marafonǵa qatysý úshin memlekettik qyzmetshi óziniń áleýmettik jelilerdegi jeke paraqshalarynda, ne bolmasa blogtarynda ózi oqyǵan kitaptar jaıly aıtyp berýi tıis. Qatysýshy óziniń jazbalarynyń sońyna mindetti túrde #umytylmasmura heshtegin qosý arqyly óziniń qatysatynyn bildiredi.
Jospar boıynsha, atalǵan marafon aǵymdaǵy jyldyń mamyr aıyna deıin jalǵasyp, sońynda qorytyndysy shyǵarylady.
Uıymdastyrýshylar barlyq qatysýshylardyń kitap oqýda jáne bul bastamany ózgelerge taratýda belsendilik tanytyp, sananyń ózgeristerge ashyqtyǵyn kórsetetinine senimdi.
«Memlekettik qyzmetshilerdiń nazaryn kitap oqyp, bilimin damytýǵa aýdarý, olardyń sanasyn arttyrý, básekege qabiletti jańa memlekettik qyzmetshiler urpaǵyn qalyptastyrý - zamanaýı memlekettik apparatqa qoıylatyn talaptardyń biri bolyp tabylatynyn atap ótken jón», -deıdi Jazıra Toqtar.
