Aqmolada mektep túlegi bitirý keshinde soqqyǵa jyǵyldy: polıtsııa qylmystyq is qozǵady
ASTANA. KAZINFORM — Aqkól qalasynda mektep bitirý keshinen keıin 18 jastaǵy túlek eresek er adamdardyń soqqysyna jyǵyldy, dep habarlaıdy Kazinform tilshisi.
Jábirlenýshiniń anasy beınejoldaý jasap, quqyq qorǵaý organdary men beıjaı qaramaıtyn azamattarǵa oqıǵanyń mán-jaıyn baıandady.
Áıeldiń aıtýynsha, 2025 jylǵy 21 maýsym kúni onyń ulyn — Aqkól qalasyndaǵy mektepterdiń biriniń túlegin — eki er adam soqqyǵa jyǵyp, dene jaraqatyn salǵan. Áıeldiń sózinshe, qaskóılerdiń jasy — 31 jáne 23-te.
— Olar spırttik ishimdik ne esirtki qoldanǵan bolýy múmkin. Er adamdardyń biri kólik júrgizip kele jatyp, alǵashynda ulymdy qaǵyp óltirmek boldy. Keıin ekeýi de kólikten túsip, ulymdy esinen tanǵansha uryp-soqty, — dedi ol.
Jas jigit aýrýhanaǵa jetkizildi. Anasynyń aıtýynsha, keıin olardyń eki tanysy aýrýhanaǵa kelip, polıtsııaǵa aryz jazbaýdy ótingen. Soqqyǵa jyqqan adamdar da sol aýrýhanada bolǵan, degenmen olar agressıvti túrde áreket etip, áıelge til tıgizip, qorqytqan.
Beınejoldaýda aıtylǵandaı, kúdiktiler áli kúnge deıin ustalǵan joq, olar bostandyqta júr.
Aqmola oblystyq densaýlyq saqtaý basqarmasynyń málimetinshe, 18 jastaǵy jigit Aqkól aýdandyq aýrýhanasynyń travmatologııa bólimine bas súıek-mı jaraqaty (soqqy saldarynan mı shaıqalý) jáne muryn súıeginiń synýy dıagnozymen túsken. Protokolǵa sáıkes, ol aýrýhanaǵa jatqyzylǵan. Em qabyldaǵannan keıin aýrýhanadan shyǵaryldy. Dárigerler onyń jaǵdaıyn turaqty dep baǵalap otyr. Aldaǵy ýaqytta ol kompıýterlik tomografııa jáne sot-medıtsınalyq saraptamadan ótedi.
Polıtsııa departamentiniń baspasóz qyzmeti habarlaǵandaı, Aqkól qalasynyń 2007 jyly týǵan turǵynyna qatysty buzaqylyq faktisi boıynsha QR QK 293-baby 2-bóligimen (buzaqylyq) qylmystyq is sol kúni tirkelip, tergeý bastalǵan.
— Janjalǵa qatysqan barlyq tulǵa birden anyqtalyp, olardan jaýap alyndy. Qazirgi ýaqytta oqıǵanyń mán-jaıyn anyqtaý boıynsha tergeý amaldary júrgizilip jatyr. Qylmystyq is polıtsııa departamenti basshylyǵynyń baqylaýynda, — dep málim etti vedomstvo.
Budan buryn habarlanǵandaı, Temirtaýda jedel járdem feldsheri soqqyǵa jyǵyldy.