Aqmolada medıtsınalyq mekemelerge 40 avtokóliktiń sertıfıkaty tapsyryldy
KÓKShETAÝ. QazAqparat - Aqmola oblysynyń ákimi Ermek Marjyqpaev Medıtsına qyzmetkerleri kúni qarsańynda óńirdegi medıtsınalyq mekemelerge arnaıy qondyrǵylarmen jabdyqtalǵan sý jańa 40 avtokóliktiń sertıfıkatyn tapsyrdy, dep habarlaıdy QazAqparat tilshisi.
Aımaq basshysy «Kókshetaý» mádenıet saraıynda Medıtsına qyzmetkerleri kúnine oraılastyrylǵan merekelik sharaǵa qatysyp, quttyqtaý sóz sóıledi.
Saltanatty shara barysynda aımaq basshysy Ermek Marjyqpaev óńirdegi medıtsınalyq mekemelerge arnaıy qondyrǵylarmen jabdyqtalǵan 40 avtokóliktiń sertıfıkatyn tapsyrdy.
«Bul kólikterdiń 30-y aýdandar men qalalardaǵy jedel-járdem medıtsınalyq qyzmet kórsetý jelilik brıgadasyna baǵyttalyp otyr. Reanımobılder turǵyndarǵa jedel-járdem kórsetýge arnalǵan, qazirgi zamanǵa saı medıtsınalyq qurylǵylarmen jabdyqtalǵan. Sonymen qatar, 10 «ÝAZ» kólikteri de aýdandyq aýrhanalar men jedel-járdem qyzmetine teń úlestiriledi», dep atap ótti óńirdiń jedel medıtsınalyq qyzmet stansasynyń bas dárigeri Aleksandr Vysotskıı.
Sonymen qatar, jyl qorytyndysy boıynsha densaýlyq saqtaý salasynynyń damýyna eleýli úles qosqan sala mamandaryna Alǵys hattar men vedomstvolyq nagradalar tabys etildi.
Aıta keteıik, Aqmola oblysynda densaýlyq saqtaý salasyn jańǵyrtýǵa zor kóńil bólinýde. Sońǵy jyldary jańa medıtsınalyq nysandar iske qosylyp, qazirgi zamanǵy tehnologııalar ıgerilýde, sondaı-aq emdeý-aldyn alý mekemelerindegi qural-jabdyqtar túbegeıli jańartylý ústinde.
