Aqmolada massaj salonynyń ıesi polıtsııaǵa para usynǵan

KÓKShETAÝ.QazAqparat-Polıtsııa qyzmetkerine para bermek bolǵan Kókshetaý turǵyny qylmystyq jaýapkershilikke tartyldy, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.

Vedomstvonyń deregi boıynsha, aǵymdaǵy jyldyń mamyr aıynda jedel-izdestirý sharasy kezinde Kókshetaý qalasyndaǵy massaj salondarynyń birinde ıntımdik qyzmet kórsetý oqıǵasyn anyqtady.

Zańsyz bıznesi úshin qylmystyq jaýapkershilikten qutylmaq bolǵan 23 jastaǵy massaj salonynyń ıesi polıtsııa qyzmetkerine 150 myń teńge kóleminde para usynǵan. Tártip saqshysy qyzmettik mindetin oryndaý kezinde paradan bas tartyp, óziniń tikeleı basshylyǵy men óz qaýipsizdigi basqarmasyna jemqorlyq qylmysy týraly habarlaǵan.

«Mamyrdyń 29-da quqyq buzýshy aqsha usyný kezinde ustaldy. Qazirgi kezde QR QK 367-babynyń 1-bóligi («Para berý») boıynsha qylmystyq is qozǵalyp, sotqa deıingi tergeý amaldary júrgizilýde», - dep aıtty vedomstvodan.

Sonymen qatar, ustalǵan massaj salonynyń eki ákimshisine qatysty QR QK 309-babynyń 1-bóligi («Jezókshelik jáne jeńgetaılyqpen aınalysý úshin qorda uıymdastyrý jáne ustaý») boıynsha qylmystyq is qozǵaldy.