Aqmolada mas júrgizýshi polıtsııadan qashamyn dep kóligin jol belgisine soqty
KÓKShETAÝ. QazAqparat - Aqmola oblysynyń Stepnogor qalasynda eki mas júrgizýshi ustaldy, dep habarlaıdy QazAqparat tilshisi oblystyq prokýratýranyń baspasóz qyzmetine silteme jasap.
Vedomstvonyń málimetinshe, 22 naýryzda Stepnogor qalasynyń polıtsııa qyzmetkerleri reıd kezinde eki adamnyń masań kúıde kólik basqarǵanyn anyqtady.
«Máselen, saǵat 10:00 mas júrgizýshi polıtsııanyń toqtaý týraly talabyna baǵynbaı qashyp ketpek boldy. Saldarynan rýlge ıe bola almaı jaıaýlar belgisine soǵyldy. Sol kúni saǵat 22:00 tártip saqshylary taǵy bir kólikti toqtatty. Onyń júrgizýshisi de masań kúıde bolǵan. Keıin anyqtalǵandaı bul eki júrgizýshi de buryn alkogoldik ishimdik iship alyp rýlge otyrǵany úshin kólik basqarý quqyǵynan aıyrylǵan. Qazirgi kezde qos júrgizýshiniń ústinen QR QK-niń 346-baby boıynsha (kólik quraldaryn basqarý quqyǵynan aıyrylǵan jáne alkogoldik masań kúıdegi adamnyń kólik quralyn basqarýy) sotqa deıingi tergeý amaldary júrgizilýde», - deıdi vedomstvodan.
Stepnogor qalalyq sotynyń tergeý sýdıasy naýryzdyń 24-de tótenshe jaǵdaı kezinde qylmystyq quqyqbuzýshylyq jasaǵan júrgizýshilerge qatysty qamaýda ustaý túrinde sanktsııa shyǵardy.
