Aqmolada mádenıet nysandaryn jóndeý boıynsha 38 joba qolǵa alynǵan

KÓKShETAÝ. QazAqparat - «Jumyspen qamtýdyń jol kartasy» baǵdarlamasyna óńirdegi mádenıet jáne arhıvter nysandary boıynsha jalpy somasy 1,3 mıllıard teńge bolatyn 38 joba engizildi, dep habarlaıdy QazAqparat tilshisi oblystyq ishki saıasat basqarmasyna silteme jasap.

Atalmysh jobalardy júzege asyrý sheńberinde oblystyń aýdandary men qalalarynda mádenıet nysandaryn kúrdeli jáne aǵymdaǵy jóndeý, rekonstrýktsııalaý jáne salý josparlanǵan.

Jaqynda Jarqaıyń aýdanynda Ýálıhanov aýyldyq mádenıet úıine kúrdeli jóndeý jumystary aıaqtaldy.

Mádenıet nysanynyń ǵımaratynda ishki úı-jaılarǵa jóndeý júrgizildi, avtomatty órt dabyly, jylytý júıesi, sýmen jabdyqtaý jáne káriz júıesi ornatyldy, elektrmen jabdyqtaý júıesi tolyǵymen jańartyldy.

Aýdandyq jumyspen qamtý ortalyǵy arqyly 12 adam jumysqa ornalasty.

«Ǵımarat syrty tolyǵymen jańartyldy, abattandyrý jumystary júrgizildi. Asfalt joldar tóseldi, ǵımarattyń qasbeti men perımetri boıynsha tósemder tóseldi, gúlzarlar ornatyldy. Kóktemde aǵashtar men gúlder otyrǵyzylady. Qazirgi ýaqytta teatr kreslolaryn ornatý boıynsha jumystar júrgizilýde, sahnaǵa arnalǵan jabdyqtarǵa tapsyrys berildi. Kitaphanada jıhaz jańartyldy, kitaphanada Kovorkıng ortalyǵyn ashý josparlanýda», - dep atap ótti aýdan ákimdigindegiler.

Aıta keteıik, búgingi tańda oblysta osy baǵdarlama boıynsha mádenıet salasynda 27 jobany júzege asyrý aıaqtaldy.