Aqmolada qyzmetinen bosatylǵan sheneýnik buǵan deıin de ádepsizdik tanytqan
Ákimdiktegilerdiń aıtýynsha, ol bul sheshimge kelispeı sotqa bermek, dep habarlaıdy QazAqparat tilshisi.
Tártiptik keńestiń uıǵarymy boıynsha Sandyqtaý aýdandyq mádenıet bóliminiń basshysy Mádına Dúısenbaeva aýdan ákiminiń 13-shi shildedegi ókimimen qyzmetinen bosatylǵan bolatyn.
«Bul jol berilmeıtin, keleńsiz jáıt. Ol osyǵan deıin de aýdandyq mádenıet bóliminde bas maman bolyp qyzmet istep júrip ádep normalaryn buzǵany úshin qyzmetinen bosatylǵan bolatyn. Keıin sot arqyly qaıta jumysqa qabyldandy», - deıdi Sandyqtaý aýdany ákiminiń orynbasary Gúlmar Qadyrova.
Onyń aıtýynsha, M.Dúısenbaeva jumys istep júrgen ýaqytynda oblystyq jáne respýblıkalyq deńgeıde kóptegen aryzdar jazdy.
«Ótken jyly aýdandyq mádenıet bóliminiń basshysy laýazymyna baıqaý jarııalandy. Ol osy qyzmetke úmitker jalǵyz adam boldy. Komıssııa ony usynbaý qajet dep sheshti. Ol sotqa shaǵym túsirdi. Ekinshi ret taǵy baıqaý jarııalandy. Onda da jalǵyz úmitker bolǵandyqtan basshylyq qyzmetke qabyldandy. Osy joly da sotqa berip, qaıta jumysqa qabyldanýǵa tyrysatyny sózsiz. Sondyqtan, onyń jumystan shyǵarylǵanyna qaramastan daý áli jalǵasatyn bolady», - dep tolyqtyrdy Gúlmar Qadyrova.
Eske sala keteıik, qaramaǵyndaǵy qyzmetkerdiń shaǵymy boıynsha Madına Dúısenbaevanyń isi jaqynda Aqmola oblysy boıynsha memlekettik qyzmet isteri jáne sybaılas jemqorlyqqa qarsy is-qımyl departamentiniń Ádep jónindegi keńesinde qaralǵan bolatyn. Onda zardap shekken er adam basshydan qorlyq kórgenin, tipti, qol kóterýge barǵanyn da jaıyp saldy. Ádep komıssııasy múshelerine aıǵaq retinde aýdıojazba da usyndy. Onda áıeldiń oǵan beıádep sózder aıtyp, ádep normalary týraly eskertýine «Seniń ádebiń kimge kerek?» dep jaýap qaıyrǵan.
Al, M.Dúısenbaeva bolsa, aýdıojazbadaǵy daýysty ózine tıesili emestigin alǵa tartty. Tipti, aıtylǵan sózderdi ádebı sózder ekenin aıtyp aqtalmaq boldy. Degenmen, Ádep keńesi biraýyzdan ony qyzmetinen bosatý týraly uıǵarymǵa keldi.
