Aqmolada qutqarýshylar ózin óltirmek bolǵan 47 jastaǵy azamatty aman alyp qaldy
KÓKShETAÝ. QazAqparat - Aqmola oblysynda qutqarýshylar ózine qol salmaq bolǵan er adamdy aman alyp qaldy, dep habarlaıdy QazAqparat.
Tótenshe jaǵdaılar komıtetiniń málimetinshe, Şýchınsk qalasynda er adam kópqabatty úıdiń balkonynan sekirip, ómirimen qosh aıtyspaq bolǵan.
«Aqmola oblysy TJD shuǵyl kezekshisi jarty saǵat boıy er adammen telefon arqyly sóılesip, psıhologııalyq kómek kórsetti. Sóıtip, ony sýıtsıd jasamaýǵa kóndirip, raıynan qaıtardy», - dep atap ótti TJK resmı ókili Nursultan Nurahmetov.
Aqmola oblystyq TJD aqparatyna sensek, ózine qol salmaq bolǵan - 47 jastaǵy Nur-Sultan qalasynyń turǵyny. Tórt balasy bar. Al ony raıynan qaıtarǵan - kúrdeli jaǵdaılar basqarmasynyń shuǵyl kezekshisi, podpolkovnık Qanat Qaıyrlınov.
Er adam «112» qyzmetine ózi qońyraý shalǵan. Janyna eshkimdi jaqyndatpaı, jarty saǵat tek qana kezekshimen sóılesken. Azamattyń mundaı qadamǵa barýyna otbasylyq qıyndyqtar sebep bolǵan.
