Aqmolada qutqarýshylar adasqan áıeldi izdep tapty
KÓKShETAÝ. QazAqparat - Aqmola oblysynda adasyp ketken áıel tabyldy, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimeti boıynsha, Qarajar aýylynyń turǵyny, Velıkaıa S. esimdi áıel otbasylyq otyrystan keıin syrtqa shyǵyp, úıine qaıtyp oralmaǵan. Týystary óz kúshimen 3 saǵat boıy izdep taba almaǵandyqtan qutqarýshylarǵa habarlasyp kómek suraǵan.
«Áıeldiń joǵalǵany týraly 2019 jylǵy sáýirdiń 6-da túngi saǵat 00:32 Qarajar bastaýysh mektebinde ornalasqan sý tasqynyna qarsy shtabqa aqparat tústi. Qarajar aýylynda apatsyz aǵyn sýdy ótkizý boıynsha jumys istep jatqan qutqarýshylar men patrýl polıtsııasyna baǵyttama berildi. Shtabtyń rezervindegi eki top aýyldyń mańyn súzip shyqty. Túnde aýa temperatýrasynyń -5 gradýs salqyn bolýy jaǵdaıdy qıyndata tústi. Degenmen, qutqarýshylardyń shıraq qımylynyń arqasynda azamattyq qorǵanys podpolkovnıkteri O.V.Malıýk jáne A.S. Kazakovtyń izdeý toby aınalasy 30 mınýttyń ishinde joǵalǵan áıeldi tapty. Áıel qatty tońǵan, ústi-basy sý, óz erkimen qozǵala da almaıdy. Sál keshikkende jaǵdaı múldem basqasha bolar edi», - deıdi vedomstvonyń baspasóz qyzmetindegiler.
Belgili bolǵandaı, qutqarýshylar áıeldi Qarajar aýylyndaǵy feldsherlik pýnktige jetkizdi. Onda alǵashqy medıtsınalyq kómek kórsetilgennen keıin úıine jiberildi.
