Aqmolada quqyqbuzýshylyqty anyqtaýǵa kómektesken oqýshy marapattaldy

ASTANA. KAZINFORM — Onyń der kezinde qońyraý shalýy mas júrgizýshini «izin sýytpaı» ustaýǵa múmkindik berdi, dep habarlaıdy Polisia.kz.

28 qarasha kúni oblystyq polıtsııa departamentiniń basshylyǵy Kókshetaý qalasyndaǵy № 12 orta mektepke baryp, quqyqbuzýshylyqty áshkereleýge kómektesken 10 jastaǵy oqýshy Alan Kolmagorovpen kezdesti.

Polıtsııa departamenti bastyǵynyń orynbasary Azamat Ashımov balaǵa jáne onyń anasy — ıÝlııa Kolmagorovaǵa azamattyq belsendilik tanytqany, kómegi jáne durys tárbıesi úshin alǵys hat tabystady.

Sonymen qatar vedomstvo atynan Alanǵa velosıped pen patrýldik polıtsııa kóliginiń maketi syıǵa berildi.

Eske salaıyq, 25 qarasha kúni «102» nómirine sur tústi kóliktiń júrgizýshisi jol qozǵalysy erejelerin óreskel buzǵany týraly habarlama túsken. Al qońyraý shalǵan azamat — 10 jastaǵy Alan Kolmagorov boldy.

Balaqaı kóliktiń túsin, markasyn jáne memlekettik nómirin naqty aıtyp bergen. Ýaqytyly jetkizilgen aqparattyń arqasynda patrýldik polıtsııa ekıpajy shuǵyl áreket etip, kúdiktini ustady. Keıin belgili bolǵandaı, atalǵan avtokólik urlanǵan bolyp shyqty.

Alannyń aıtýynsha, quqyq buzýshylyqty ol dosymen birge baıqasa da, polıtsııaǵa qońyraý shalý týraly sheshimdi ózi qabyldaǵan. Óıtkeni júrgizýshiniń áreketi aýyr saldarǵa ákelýi múmkin ekenin túsingen.

— Júrgizýshi bireýge zııan tıgize me dep qoryqtym, — dedi ol. 

Al anasy ıÝlııa Valerevna Alannyń mundaı jaýapkershilik pen qoǵamdyq tártipke nemquraıdylyq tanytpaýy otbasyndaǵy tárbıeniń nátıjesi ekenin aıtady. Onyń sózinshe, bala jasynan óz pikirin ashyq aıtyp, ádildik týraly túsinigi qalyptasqan.

Polıtseıler tarapynan kórsetilgen qurmet Kolmagorovtar otbasy úshin kútpegen syı boldy. Alan men onyń anasy tártip saqshylaryna nazar men qoldaý kórsetkenderi úshin alǵys bildirdi. Alan bıyl 16 jeltoqsan — Táýelsizdik kúni qarsańynda 11 jasqa tolady.

Budan buryn polıtsııa dropper bolýdyń saldary qandaı bolatynyn túsindirdi.