Aqmolada kúdikti úsh jyl boıy turǵynnan aqsha bopsalap kelgen
Vedomstvonyń málimetinshe, shilde aıynda Kókshetaý qalasynyń turǵyny polıtsııaǵa aryz bergen. Er adam beıtanys bireýdiń ózinen úsh jyl boıy qorqytý jáne zorlyq-zombylyq arqyly aqsha talap etip kelgenin aıtty. Óz densaýlyǵyna qaýiptenip, únemi qaýipten sharshaǵan jábirlenýshi polıtsııaǵa kómek surap júgindi.
«Jedel-izdestirý is-sharalary barysynda Aqmola oblysy PD Krımınaldyq polıtsııa basqarmasynyń qyzmetkerleri buryn Qylmystyq kodekstiń 104-shi babynyń 1-shi bóligi «Abaısyzda qazaǵa ushyratý» boıynsha qylmystyq jaýapkershilikke tartylǵan 35 jastaǵy oblys ortalyǵynyń turǵynyn anyqtady. Kúdikti jábirlenýshige bankten nesıe resimdeýdi talap etken. Al bul múmkin bolmaǵan kezde er adamnan turmystyq tehnıkasyn kúshtep tartyp alǵan»,- dedi vedomstvodan.
Qazirgi kezde osyǵan baılanysty Qylmystyq kodekstiń 194-shi babynyń 1-shi bóligi «Qorqytyp alý» boıynsha sotqa deıingi is júrgizý bastaldy. Osy baptyń sanktsııasy 4 myń aılyq eseptik kórsetkish mólsherde aıyppul salý nemese sol kólemde 1 myń saǵatqa deıingi merzimge qoǵamdyq jumystarǵa tartý, ıá bolmasa 4 jylǵa deıingi merzimge bas bostandyǵynan shekteý nemese sol merzimge bas bostandyǵynan aıyrý túrinde jaza qarastyrylǵan.