Aqmolada qoıma meńgerýshisi men júrgizýshi 112 myń jumyrtqany joq qylǵan
KÓKShETAÝ. QazAqparat - Aqmola oblysynda quny 3 mln teńgeden asatyn 112 myń jumyrtqany jymqyrǵan eki kúdikti anyqtaldy, dep habarlaıdy QazAqparat óńir polıtsııasynyń baspasóz qyzmetine silteme jasap.
Jańa jyl qarsańynda Aqmola oblysy Tselınograd aýdany polıtsııasynyń kezekshi bólimine jergilikti jaýapkershiligi shekteýli seriktestiginiń ókili habarlasqan.
Onyń aıtýynsha, qoımada 112 myń jumyrtqa jetispeıdi. Kelgen zalaldyń kólemi 3 mln teńgeden asady.
«Oqıǵa ornyna kelgen tártip saqshylary qoımany egjeı-tegjeıli tekserip, beınebaqylaý kamerasynyń jazbasyn túgel qarap shyqqan. Sol arqyly eki kúdikti anyqtaldy. Olar - 28 jastaǵy qoıma meńgerýshisi jáne osy JShS seriktesi sanalatyn jeke kásipkerliktiń 37 jastaǵy júrgizýshisi. Kúdiktiler óz kinásin moıyndady» dep málim etti vedomstvo.
Meńgerýshi men júrgizýshige qatysty Qylmystyq kodekstiń «senip tapsyrylǵan múlikti talan-tarajǵa salý» babymen qylmystyq is qozǵalyp, tergeý júrip jatyr.
