Aqmolada koronavırýs juqtyrǵan eki áıelge qatysty tyń derekter jarııalandy
KÓKShETAÝ. QazAqparat – Aqmola oblysynda taǵy 2 adamnyń koronavırýs ınfektsııasyn juqtyrǵany anyqtaldy, dep habarlaıdy QazAqparat tilshisi oblystyq taýarlar jáne kórsetiletin qyzmetterdiń sapasy men qaýipsizdigin baqylaý departamentine silteme jasap.
«Bul joly koronavırýs Astrahan aýdanynyń turǵyndary 1993 jylǵy eki áıelden tabyldy. Onyń bireýi - Astrahan kentinde, ekinshisi Novocherkask aýylynda turady. Ekeýi de JRVI belgilerimen medıtsınalyq kómekke júgingen. Dene qyzýy 38 gradýsqa deıin kóterilip, álsizdikke, jótelge shaǵymdanǵan. Naýqastarǵa bekitilgen klınıkalyq hattamaǵa sáıkes medıtsınalyq kómek kórsetiledi» deıdi vedomstvodan.
Astrahan aýdandyq taýarlar jáne kórsetiletin qyzmetterdiń sapasy men qaýipsizdigin baqylaý basqarmasy úı oshaǵynda epıdemııaǵa qarsy dezınfektsııalaý, sondaı-aq, naýqastarmen baılanysty bolǵan adamdary anyqtaý boıynsha sanıtarlyq-epıdemıologııalyq sharalardy júrgizedi.
«Aqmola oblysynda osymen COVID-19 juqtyrǵandardyń sany 186 adam boldy. Al, jazylyp shyqqandar 141 adamǵa jetti» dep tolyqtyrdy vedomstvodan.
