Aqmolada kólik ınspektorlaryna shabýyl jasady degen kúdikpen 5 adam ustaldy
NUR-SULTAN. QazAqparat – Aqmola oblysynda kóliktik baqylaý ınspektorlaryna jasalǵan shabýylǵa qatysty qylmystyq is qozǵaldy, dep habarlaıdy QazAqparat tilshisi.
Oqıǵa 15 sáýirde bolǵan. Alaıda qylmysqa qatysy bar adamdar izin sýytyp ketken. Búgin blokposttaǵy oqıǵa boıynsha Kókshetaý qalasynyń polıtsııa departamenti júrgizgen izdestirý sharalary barysynda atalǵan oqıǵaǵa qatysy bar 5 kúdikti azamat ustalǵan. Olarǵa tıesili «KamAZ» aıyppul turaǵyna qoıylǵan.
«Ustalǵan adamdarǵa qatysty tártip saqshylary qylmystyq is qozǵap, qazirgi ýaqytta tergeý amaldary júrgizilip jatyr. Polıtsııa departamentiniń málimetinshe, kúdiktilerdiń qylmysy dáleldense, olar QR QK 389-babynyń 3-bóligi boıynsha 3 myń AEK (8,3 mıllıon teńge) deıingi mólsherde aıyppul arqalaýy nemese túzetý jumystaryna, 800 saǵatqa deıingi merzimge qoǵamdyq jumystarǵa nemese 3 jylǵa deıin bas bostandyǵyn shekteý/aıyrý túrindegi jazaǵa tartylýy múmkin», - dep habarlaıdy QR IIDM Kólik komıtetiniń baspasóz qyzmetinen.
Al kóliktik baqylaý organdary tasymaldaýshyǵa qatysty ákimshilik is qozǵap, 277 800 teńge kóleminde aıyppul salǵan.
Esterińizge sala keteıik, 2020 jyldyń 14 sáýirinde «Kókshetaý-Qostanaı» aınalma avtojolynda kóliktik baqylaý ınspektsııasynyń mamandary jyljymaly kóliktik baqylaý beketinde kezekshilikti atqarý kezinde Reseıde tirkelgen E006TB72 m/n «Kamaz 53205» markaly sheteldik avtokólik quraly (57kea03 m/n tirkemesi) toqtatylǵan bolatyn. Al erteńinde 2020 jyldyń 15 sáýirinde saǵat 14:15-te beket mamandaryna memlekettik tirkeý nómirsiz úsh jeńil avtokólikpen (Lexus 470 qara tústi, Toyota Land Cruiser 200 shıe tústi jáne Lada Largus aq tústi) kelgen 5-6 adam shabýyl jasaǵan.
