Aqmolada «Qazaqstannyń úzdik taýary» baıqaýynyń óńirlik jeńimpazdary anyqtaldy
KÓKShETAÝ. QazAqparat - Aqmola oblysynda «Qazaqstannyń úzdik taýary» baıqaýynyń óńirlik jeńimpazdary anyqtaldy, dep habarlaıdy QazAqparat tilshisi.
Kókshetaý qalasynyń 195 jyldyǵyn merekeleýge arnalǵan saltanatty jıyn barysynda ótken «Qazaqstannyń úzdik taýary» óńirlik baıqaý sheńberinde «Aqmola ónimderi» atty aýqymdy óńirlik kórme-jármeńkesi ótti. Oǵan 150-den astam aqmolalyq taýar óndirýshi qatysyp, óz ónimderin usyndy.
Al, baıqaý jeńimpazdaryn Aqmola oblysynyń ákimi Ermek Marjyqpaev marapattady.
«Bizdiń oblystaǵy taýar óndirýshilerdiń ónimderi joǵary sapasy jáne úlken suranysymen erekshelenedi. Kóptegen jergilikti kásiporyndar ónimderin oblys aýmaǵyna ǵana emes, respýblıka, tipti Reseı, alys-jaqyn shet elderdiń naryǵyna shyǵarady», - dep atap ótti aımaq basshysy E.Marjyqpaev.
Baıqaýǵa oblystyń ár óńirinen jınalǵan barlyǵy 61 kásiporyn men jeke kásipkerler qatysty. Baıqaý jeńimpazdary «Óndiristik maqsattaǵy úzdik taýarlar», «Halyq arnalǵan úzdik taýarlar» jáne «Eń úzdik azyq-túlik taýarlary» atalymdary boıynsha anyqtaldy.
«Óndiristik maqsattaǵy úzdik taýarlar» atalymy boıynsha Astrahan aýdanyndaǵy «Azam-KS» JShS, Kókshetaý qalasyndaǵy «Dıas» tigin fabrıkasy» JShS, Birjan sal aýdanyndaǵy «Kókshe-Tsement» JShS, «Halyqqa arnalǵan úzdik taýarlar» atalymy boıynsha Býrabaı aýdanyndaǵy «Vesta-Býrabaı» tigin salony, Kókshetaý qalasyndaǵy «MSMWOOD» JShS jáne «Qaztehnıks» JShS, «Eń úzdik azyq-túlik taýarlary» atalymy boıynsha Atbasar aýdanyndaǵy «Atbasar maıy» JShS, Tselınograd aýdanyndaǵy «CAPITAL PROJEKT LTD» JShS jáne «Zeren asyl tuqymdy sharýashylyq» JShS jeńimpaz atandy.
«Óńirlik baıqaýdyń 9 jeńimpazy «Qazaqstannyń úzdik taýary» baıqaýynda oblystyń atynan synǵa túsetin bolady. Baıqaýdyń basty maqsaty – otandyq taýar óndirýshilerdi naryqta ózderin belsendi tanystyryp ónimdi alǵa tartýǵa yntalandyrýdy» – dedi óńirlik kásipkerler palatasynyń dırektory Tımýr Naqypbekov.
