Aqmolada qazaq tilin damytý jumysy qalaı bastaldy
"90-jyldary Aqmoladaǵy jigitter tilimizdi qorǵaıyq dep, osynda "Qazaq tili" qoǵamyn qurǵanbyz. Ol respýblıkada eń birinshi qazaq tili qoǵamy boldy. Almatydaǵy qoǵam úsh aıdan keıin quryldy. Sol kezde qolymyzǵa qaǵaz-dápter alyp, qudaıdyń qutty kúni jumystan keıin úılerdiń esigin qaǵatynbyz. Bir esikti ashasyń, orys ashady. "Izvınıte, pojalýısta, Mýrat kakom etaje?" de ótirik suraısyń, "Nıkogo Mýrata ne znaıý!" dep esikti gúrs etkizedi. Sodan kelesi esikten bir qazaq shyǵady. "Qazaq synyptaryn ashaıyn dep edik, balabaqsha ashaıyn dep edik. Soǵan toptarǵa bala jınap júrmiz. Balańdy beresiń be?" deseń, "Ne sandalyp júrsiń!" dep ol esikti gúrs etkizedi. Úshinshi bir esikte "Oılanaıyq!" deıdi. Tórtinshi esikke barǵanda kelisedi. Mine, osylaı-osylaı biz jaz boıy, kúz boıy balalardy jınap, sol jyly qazaq balabaqshasyn ashtyq. Bári sodan bastaldy", - deıdi Aldan aǵa.
Onyń aıtýynsha, bir jyldyń ishinde 10-15 mektepte qazaq synyptary ashyldy. Sodan qazaq mektepteri kóptep ashyla bastady. Úsh-tórt jyldyń ishinde oblys boıynsha ondaı mektepterdiń sany 92-ge jetti. Astanadaǵy Qalıbek Qýanyshbaev atyndaǵy teatr da "Qazaq tili" qoǵamynyń bastamasymen ashylǵan bolatyn.
"Respýblıka boıynsha alǵash ret osyndaǵy aýyl sharýashylyǵy ınstıýty, medıtsınalyq ınstıtýt, ınjenerlik-qurylys ınstıtýty, pedagogıkalyq ınstıtýt janynan búkil fakýltetterdi qazaq tilinde bilim beretin qyldyq. Ondaı bolǵan emes. Sol kezde joǵary oqý oryndaryndaǵy qazaq azamattary kózdiń maıyn taýysyp, oqýlyqtardy aýdardy. Sonyń bárin tıpografııadan jaman sary qaǵazdarǵa basyp shyǵardyq. Sóıtip, qazaq bólimderi ashyldy. Artynan dekanattar quryldy. Jańǵyrý" degen osy ma? Osy. Jańǵyrý úshin osylaı jumys isteý kerek. Aǵaıyn, meniń buny aıtyp otyrǵanym, jańǵyrǵylaryń kelse, óskilerińiz kelse, sózdi qoıyp, osylaı jumys isteý kerek. Jasyń jetpiste me, birde me, eldiń arasyna shyq ta, álgindeı jumys iste", - dep atap kórsetti Aldan Smaıyl.
