Aqmolada karantın talaptaryn buzǵandarǵa 444 myń teńge aıyppul salyndy

KÓKShETAÝ. QazAqparat – Aqmola oblysy bir aıǵa jýyq «qyzyl» aımaqta tur. Óńir koronavırýske oń test boıynsha respýblıkada ekinshi orynda. Bul týraly aǵymdaǵy epıdemıologııalyq jaǵdaıǵa qatysty ótken brıfıngte óńirdiń bas memlekettik sanıtarlyq dárigeri Aınagúl Mýsına málim etti, dep habarlaıdy QazAqparat tilshisi.

Óńirdiń bas memlekettik sanıtarlyq dárigeriniń aıtýynsha, sońǵy aptada aýrýdyń ósýi aıtarlyqtaı tómendegen.

«Bıylǵy jyl basynan beri oblysta koronavırýs ınfektsııasyn juqtyrýdyń 18 myńnan astam jaǵdaıy rastalyp otyr. Osy aralyqta 35 aqmolalyq kóz jumdy. Tek sońǵy táýlikte COVID-19 zerthanalyq rastalǵan 75 jaǵdaı anyqtaldy, onyń 11- i balalarda», -dedi A.Mýsına.

Óńirdiń bas memlekettik sanıtarlyq dárigeri atap ótkendeı, jyl basynan beri oblysta 251 reıdtik is-shara ótkizilgen, sondaı-aq, monıtorıng barysynda karantındik talaptardy buzǵan tórt nysan anyqtalyp, onyń úsheýine 444 myń teńge aıyppul salynǵan.

«Budan bólek, jyl basynan beri 688 adamnyń úıde oqshaýlaýdy saqtamaǵany belgili boldy. Olar «Ashyq» jobasy arqyly anyqtaldy. 28 turǵyn ákimshilik jaýapkershilikke tartyldy. Olar 1,3 mıllıon teńge kóleminde aıyppul aldy. Al, qalǵandary boıynsha jumystar júrgizilýde», - dep túıindedi A.Mýsına.