Aqmolada qar qorshaýynda qalǵan hal ústindegi áıel aýrýhanaǵa jetkizildi
ASTANA. QazAqparat - Aqmolalyq qutqarýshylar hal ústinde jatqan áıeldi aýrýhanaǵa jetkizdi. Qardyń qalyńdyǵynan qutqarýshylar arnaıy tehnıkany qoldanýyna týra keldi, dep habarlaıdy QazAqparat oblystyq tótenshe jaǵdaılar departamentine silteme jasap.
6 aqpan kúni departamenttiń biryńǵaı kezekshi-dıspetcherlik qyzmetine azamat Q. Qaıyrov habarlasyp, Jańa Qarabaýyr aýylynda 1950 jyly týǵan aýyr jaǵdaıda jatqan áıeldi Býrabaı aýdanynyń ortalyq aýrýhanasyna jetkizý qajettigin aıtady.
Naýqasty aýrýhanaǵa jetkizý úshin jiberilgen «jedel járdem» kóligi qalyń qardan óte almaǵan. Al joldyń qaryn kúreýge jiberilgen traktordyń dızel janarmaıy qatyp qalǵan.
Osyǵan baılanysty, naýqasty aýrýhanaǵa jetkizý úshin departamenttiń jedel qutqarý jasaǵyn Qyzylaǵash aýylynyń terapevtimen birge «Trekol» arnaýly tehnıkasymen jiberýge sheshim qabyldandy.
Áıel aýrýhanaǵa jetkizip jatqyzyldy, qazir onyń ómirine qaýip tónip turǵan joq.
