Aqmolada qar kóligi apatynan keıin komaǵa túsken qyz esin jımastan qaıtys boldy

ASTANA. KAZINFORM — Aqmola oblysynda qar kóligimen bolǵan jol apatynan aýyr jaraqat alyp, komaǵa túsken 25 jastaǵy qyz toǵyz kúnnen keıin qaıtys boldy, dep habarlaıdy Kazinform tilshisi.

Oblystyq densaýlyq saqtaý basqarmasynyń baspasóz qyzmetiniń málimetinshe, zardap shekken qyz bas súıegi, onyń negizi men bet qańqasynyń synýy, sondaı-aq jabyq bas-mı jaraqatyn alǵan.

Naýqas uzaq ýaqyt tereń koma jaǵdaıynda bolyp, jasandy tynys alý apparatynyń kómegimen tynys alǵan. Ókinishke qaraı, patsıentte syrtqy titirkendirgishterge esh reaktsııa bolmaǵan.

Dárigerler onyń ómirin saqtap qalý úshin bar kúshin salǵanymen, 23 aqpan kúni tańerteń boıjetken kóz jumdy.

Eske salaıyq, oqıǵa Býrabaı aýdany aýmaǵynda bolǵan. Qar kóligi jolaýshysymen birge aǵashqa soǵylǵan. Osy jaǵdaıdan keıin oblys polıtseıleri qar kólikteri men kvadrotsıklderdi tekserýdi bastady. Ásirese demalys aımaqtaryna, onyń ishinde Býrabaı kýrorttyq aýmaǵyna erekshe nazar aýdaryldy.