Aqmolada qant dıabetine shaldyqqandardyń sany artty
KÓKShETAÝ. QazAqparat - Aqmola oblysynda eresekter men balalardyń arasynda qant dıabetine shaldyqqandardyń sany artyp keledi, dep habarlaıdy QazAqparat tilshisi.
«Áleýmettik medıtsınalyq saqtandyrý qory» kommertsııalyq emes aktsıonerlik qoǵamy Aqmola oblystyq fılıalynyń málimeti boıynsha 2017 jyldyń sáıkes kezeńimen salystyrǵanda qan dıabetimen aýyratyndar sany 4,8 paıyzǵa artty. Máselen, ótken jyly osy dertke shaldyqqan 14997 adam tirkelse, bıylǵy jyldyń on aıynda bul kórsetkish 15758 adamǵa jetken.
Dert eresekterdiń arasynda ǵana emes, 17 jasqa deıingi balalardyń arasynda da kezdesedi. 2017 jyly 160 balada qant dıabeti tirkelse, v 2018 jyly bul kórsetkish 169 jetti.
«Dertke shaldyǵýdyń eń basty sebebi adamnyń kúndelikti ómirine, tamaqtanýyna baılanysty. Sonymen birge, derttiń tuqym qýalaýshylyq arqyly bolatynyn da joqqa shyǵara almaısyń. Degenmen, kóptegen jaǵdaıda durys tamaqtanbaý, tez ázirlenetin taǵamdy paıdalaný, tátti gazdandyrylǵan sýsyn, alkogol jáne temeki qoldaný, sondaı-aq az qımyldaýdyń saldarynan bolady», - dep túsindirdi Aqmola oblysynyń shtattan tys bas endokrınology Núrılá Kenjetaeva.
Qant dıabetiniń ulttyq tirkelimi boıynsha 2018 jyldyń 1 qańtaryndaǵy jaǵdaı boıynsha Qazaqstanda 309 myń adamnyń qant dıabetine shaldyqqany tirkeldi. Onyń ishinde 18 myń adam birinshi tıpti, 291 myń adam (onyń 65 paıyzy áıelder) ekinshi tıpti.
Qant dıabetimen aýyratyn adamdardyń 6 myńynyń kózi shel basqan. Al, 3 myńy mıokart ınfarktisimen naýqastanady. Buǵan qosa, 1 myńnan astam syrqatqa ampýtatsııa jasalǵan.
Qazaqstanda qant dıabetimen aýyratyndardy emdeý tegin. Tegin medıtsınalyq kómektiń kepildi kóleminiń qant dıabetine shaldyqqandarǵa 48 dári-dármek jáne medıtsınalyq ónim túrleri beriledi.
«Jalpy, derti asqynǵan bir eresek adamǵa táýlik boıy stantsıonarda emdelýi úshin memleket 126005 teńge, al, kúndizgi stantsıonarda emdelgenderge 31 500 teńge jumsaıdy. Derti asqynbaǵan naýqasqa táýlik boıy stantsıonarda emdelýi úshin memleket 81 618 teńge, al kúndizgi stantsıonarda emdelgenderge 20 400 teńge jumsalady.
Aıta keter jaıt, balalarǵa jumsalatyn qarjy sál kóbirek. Bir balanyń stantsıonarda emdelýi úshin 139 085 teńge, al, kúndizgi stantsıonarda 34 771 teńge qajet», - dep túsindirdi «Áleýmettik medıtsınalyq saqtandyrý qory» kommertsııalyq emes aktsıonerlik qoǵamy Aqmola oblystyq fılıalynyń dırektory Nurlan Aqylbekov.
