Aqmolada kámelet jasyna tolmaǵan qyz mas kúıinde ustaldy
Aqmola oblysy boıynsha jemqorlyqqa qarsy is-qımyl departamentiniń málimetinshe, «Aqmola - adaldyq alańy» jobasynyń sheńberinde Aqmola oblysynyń ıývenaldy polıtsııasynyń qyzmetkerleri «Sanaly urpaq» klýbynyń jáne jobalyq keńseniń ókilderimen birlesip, kámeletke tolmaǵan balalardyń quqyq buzýshylyqtaryn anyqtaýǵa jáne aldyn alýǵa baǵyttalǵan reıdtik-aldyn alý sharalaryn ótkizdi.
«Shara barysynda polıtsııa organyna 2 kámelet jasqa tolmaǵan stýdent jetkizildi. Onyń biri - 16 jastaǵy jasóspirim úı mańynda temeki tartqany úshin ustaldy. Tergeý sharasy barysynda balanyń ata-anasynyń qalada turmaıtyny, ony tárbıeleýmen ájesi aınalysatyny anyqtaldy. Kámelet jasqa tolmaǵan balanyń óz kinásin moıyndaǵanyn jáne buǵan deıin jaýapqa tartylmaǵanyn eskere otyryp jumys toby ókilderi onymen quqyq buzýshylyqtardyń aldyn alý maqsatynda áńgimelesip, aýyzsha eskertý jasady», deıdi vedomstvonyń baspasóz qyzmetindegiler.
Sonymen qatar, jumys toby mas kúıinde júrgen 17 jastaǵy qyz ustady. Medıtsınalyq tekseris kámelettik jasqa tolmaǵan qyzdyń jeńil mas kúıde bolǵanyn anyqtady.
«Ustalǵan qyzdyń 19 jas shamasyndaǵy qurbysy jaldamaly páterde jasóspirimge sendirý jáne májbúrleý arqyly alkogol usynǵan eken. Reıdtik sharalar barysynda kámelet jasqa tolǵan qyz ustalyp, QR ÁQbK 131-baby boıynsha jaýapqa tartyldy», dep tolyqtyrdy vedomstvodan.
«Aqmola - adaldyq alańy» jobalyq keńsesi ata-analardyń nazaryn balalardyń jaman ádetteriniń aldyn alýǵa jáne olardyń tárbıesine kóbirek kóńil bólýge shaqyrady.