Aqmolada iz-túzsiz joǵalǵan stýdent qyz tabylmaı jatyr
KÓKShETAÝ. QazAqparat - Aqmola oblysynda iz-túzsiz joǵalǵan 16 jastaǵy stýdent qyz tabylmaı jatyr, dep habarlaıdy QazAqparat tilshisi.
«Anastasııa Mıhaılovna Mýzykına 07.10. 2002 jyly týǵan. Şýchedegi týrızm jáne sport kolledjiniń 1-kýrsynda oqıdy. Qarashanyń 9-da kolledj jataqhanasynan kıimderin jınap, belgisiz jaqqa ketip qalǵan. 11 qarasha kúni Aqylbaı aýylynda turatyn ákesi Býrabaı aýdandyq PB kezekshilik bólimine habarlasqan», - dep túsindirdi Aqmola oblysynyń PD baspasóz qyzmetindegiler.
Vedomstvonyń málimetinshe, qazirgi kezde izdeý jumystary júrip jatyr. Polıtseıler joǵalǵan qyz týraly málimetter bolsa, «102» telefon nómiri arqyly quqyq qorǵaý organdaryna habarlasýdy suraıdy.
Aıta keteıik, Anastasııa Mıhaılovna Mýzykına 07.10. 2002 jyly týǵan. Boıy - 160-162 santımetr, shashy uzyn, qara. Qoı kózdi, tompaq erin, orta boıly. Erekshe belgileri joq. Ústine qara-kók tústi keýdeshe, qara-kók tústi beldemshe, qara qysqa qonysh etik kıgen.
Anastasııanyń joǵalǵany týraly áleýmettik jelide tuspaldaý jarııalandy.
