Aqmolada iri qus fabrıkasy salynyp jatyr
KÓKShETAÝ. QazAqparat - Aqmola oblysy Zerendi aýdanynyń ákimi Asqar Muratuly óńirlik kommýnıkatsııalar qyzmetinde óńirdiń áleýmettik-ekonomıkalyq damýynyń 8 aıyndaǵy qorytyndysy týraly aıtty, dep habarlaıdy QazAqparat tilshisi.
Asqar Muratulynyń aıtýynsha, 2017 jyldyń qańtarynan tamyz aılary arasynda aýyl sharýashylyǵynda óndirgen jalpy ónim kólemi 9,4 mıllıard teńgeni quraǵan. Naqty qnimniń kólemi 101,8 paıyzǵa jetip, aýdan aýyl sharýashylyǵy salasy boıynsha oblysta 6 orynǵa turaqtady.
«Bıylǵy jyly aýdan dıqandary agrotehnıkalyq sharalardy utymdy qoldanýdyń arqasynda egin oraǵyn ýaqtyly aıaqtap, gektar túsimi 17,2 tsentnerden aınaldy», - dep atap ótti aýdan ákimi óz sózinde.
Sonymen birge, mal azyǵyn daıyndaý máselesi de sóz boldy. Aýdanda mal sharýashylyǵy qysqa daıyn. Qysqa jetetin jem-shóp qory tolyq ázirlengen. Agrarly aýdanda mal sharýashylyǵyna zor kóńil bólinip keledi. Degenmen, byltyrǵy jylmen salystyrǵanda bıyl iri qara sany sál kemigeni baıqalady. Esesine, jylqy, qoı men eshki, shoshqa jáne qus sany artyp otyr. Jyl basynan beri aýdan boıynsha et óndirisi 6,1 myń tonnany jáne sút óndirisi 35,3 myń tonnany qurady. Ónerkásip salasynda óndirilgen óniminiń kólemi 2017 jyldyń segiz aıynda 117,5 mıllıard teńgege jetti. Bul ótken jyldyń sáıkes kezeńimen salystyrǵanda naqty kólem ındeksi 114,1 paıyzdy qurady.
Aýdanda ınvestıtsııalyq jobalar da qolǵa alynýda. Asqar Muratulynyń sózine qaraǵanda, «Údemeli ındýstrııalyq-ınnovatsııalyq damý» baǵdarlamasy aıasynda, 2016 jyly kásipkerlikti qoldaý kartasyna «Blık Termınal» seriktestiginiń qus fabrıkasy engizildi. Bul jobanyń quny 1 mıllıard teńge baǵalanyp, 2018 jyly júzege asyrý josparlanǵan. Kásiporynnyń jyldyq qýaty 250 tonna qus etin óndirýge múmkindik beredi.
Buǵan qosa, aýdanda quny 5,4 mıllıard teńgege «Araı Pro» jaýapkershiligi shekteýli seriktestiginiń kaolın óndiretin taý-ken kombınatynyń qurylysy júrgizilýde. Aýdanda kásipkerlik qyzmeti keń qanat jaıýda. Onyń ishinde bıyl qoldanysqa berilgen «Sógetti» meıramhanasy men jańadan salynyp jatqan «Ańsat» qonaq úı kesheni jáne «Bıbi Sara» demalys aımaǵyn aıta ketken jón.
Turǵyn úı-kommýnaldyq sharýashylyǵynda aýdandyq mańyzy bar avtomobıl joldaryna aǵymdaǵy jyly 80 mıllıon teńge bólingen. Bul qarjyǵa «M.Ǵabdýllın-Qanaı bı», «Aqkól-Qazaqstan», «Bereznıakovka-Kókshetaý-Qostanaı» tas joly ýchaskelerinde aǵymdaǵy jóndeý jumystary júrgizildi. Oǵan qosa, «Býrabaı-Zerendi» tas joly da jóndelýde.
Sondaı-aq, «Elikti» taý shańǵy bazasyna aparatyn joldy qalpyna keltirýdiń de birinshi kezeńi júzege asyrylýda. Aýyldyq eldi mekenderdi sapaly aýyz sýmen qamatamasyz etý baǵytynda aýqymdy jumystar qolǵa alynǵan. Osy baǵytta Ortaq, Pavlovka, Serafımovka, Sımferopol, Prırıchen, Isakovka, Qostomar jáne Qonysbaı aýyldaryna tartylǵan sý qubyrlary jóndeldi. Abattandyrý, sanıtarlyq is-sharalar, qoqys shyǵarý baǵytynda da biraz sharýanyń basy qaıyrlǵan.
«Mádenıet salasynda esepti kezeńde 167 mádenı-demalys sharalary ótkizilip, oǵan 11 myń adam qatysqan. Júıeli túrde dene shynyqtyrýmen jáne sportpen shuǵyldanýshylar sany aýdan boıynsha jyldan jylǵa arta túsýde. Qoǵamdyq tártip boıynsha aýdan aýmaǵynda 260 qylmys tirkelgen», - dep sózin túıindedi aýdan ákimi.
