Aqmolada ınspektor poıyz brıgadırlerinen júıeli túrde para alǵan – agenttik

NUR-SULTAN. QazAqparat – QR Sybaılas jemqorlyqqa qarsy is-qımyl agenttiginiń málimetine saı, Aqmola oblysy boıynsha kóliktik baqylaý ınspektsııasynyń bólim basshysy T.Ospanov poıyz brıgadırlerinen 5-20 myń teńge aralyǵynda aqsha alyp otyrǵan, dep habarlaıdy QazAqparat tilshisi.

«Aqmola oblysynda Kókshetaý qalalyq sotynyń úkimimen Aqmola oblysy boıynsha kóliktik baqylaý ınspektsııasynyń bólim basshysy T.Ospanovqa 3,3 mln teńge somasynda, burynǵy qyzmetkerler J. M. Úsentaevke 1 mln 790 myń teńge jáne K. Nurbekovqa 1,1 mln teńge aıyppul salyndy. Bul jaǵdaıda Ospanov qyzmettik jaǵdaıyn paıdalanǵan. Ol Úsentaev pen Nurbekovtyń astyrtyn qoldaýymen júıeli túrde poıyz brıgadırlerinen 5-20 myń teńge aralyǵynda aqsha alyp otyrǵan. Ospanov jolaýshylardy bıletsiz tasymaldaý men júkterdi zańsyz alyp júrýdiń jolyn kesý sharalaryn qabyldamaǵan», - dedi QR Sybaılas jemqorlyqqa qarsy is-qımyl agenttigi birinshi departamentiniń aǵa tergeýshisi Danııar Bıgaıdarov vedomstvoda ótken baspasóz máslıhatynda.

Agenttik ókili Aqmola oblysy boıynsha kóliktik baqylaý ınspektsııasynyń bólim basshysyna qatysty 17 faktiniń anyqtalǵanyn aıtady.

«Taldaý jumystary kórsetip otyrǵandaı, kóliktik baqylaý qyzmetkerleri jasaǵan sybaılas jemqorlyq qylmystarynyń eń kóp taralǵan túri - paraqorlyq jáne laýazymdyq ókilettikterin teris paıdalaný», - dedi ol.