Aqmolada halyqty áleýmettik qorǵaý salasynyń qyzmetkerleri marapattaldy
KÓKShETAÝ. QazAqparat - Kókshetaýda áleýmettik qorǵaý júıesi qyzmetkerleriniń kásibı merekesine arnalǵan saltanatty is-shara ótti, dep habarlaıdy QazAqparat tilshisi.
«Dostar» mádenıet saraıynda bolǵan shara 10 arnaıy áleýmettik qyzmet kórsetý ortalyǵynyń qamqorlyǵyndaǵy qarttar men múmkindigi shektelgen jandardyń shyǵarmashylyq jumystarynyń kórmesimen bastaldy.
Sharaǵa qatysyp, quttyqtaý sóz sóılegen Aqmola oblysynyń ákimi Ermek Marjyqpaev qoǵamnyń turaqtylyǵy men ál-aýqaty halyqtyń áleýmettik qorǵalý deńgeıin aıqyndaıtynyn atap ótti.
«Árdaıym, naqtyly bir adamǵa kómektesip, sizder memlekettik mindetti oryndaısyzdar – azamattardyń áleýmettik ádildigi men áleýmettik kepildigin qamtamasyz etesizder», – dedi aımaq basshysy.
Oblys ákimi atap ótkendeı, aǵymdaǵy jyly «Eńbek» baǵdarlamasyn júzege asyrýǵa 8 mıllıard teńgeden astam qarjy bólinipti. Osynyń nátıjesinde Jumyspen qamtý ortalyqtary 13 myń jumyssyzdar men ózin-ózi nátıjesiz jumyspen qamtyǵan azamattardy jumysqa ornalastyrdy. Oblysta erekshe qajettiligi bar 29 myń adam turady. Olardy qamtamasyz etý úshin ońaltý qarjysynan 470 mıllıon teńge bólindi. Bul ótken jylmen salystyrǵanda 43 paıyzǵa kóp. Oblystyń áleýmettik qorǵaý júıesinde bir jarym myńnan asa qyzmetker eńbek etedi. Olar 200 myń aqmolalyqtarǵa baǵa jetpes kómek kórsetedi.
Shara barysynda aımaq basshysy eńbek ozattaryna vedomstvolyq nagrada, qurmet gramotasy jáne Alǵys hat tabys etti.
Olardyń arasynda Kókshetaý qalasynyń jumyspen qamtý jáne áleýmettik baǵdarlamalar bóliminiń bas mamany Ásııa Jamanova «Eńbek ardageri» qurmetti medaline ıe boldy. Eńbek, áleýmettik qorǵaý jáne kóshi-qon komıteti departamentiniń bas mamany Elena Býga, Tselınograd jáne Bulandy aýdandary jumyspen qamtý jáne áleýmettik baǵdarlamalar bólimderiniń bas mamandary Nursulý Baqtybaeva men Kenjebıke Esmaǵanbetova «Áleýmettik eńbek salasynyń úzdigi» tósbelgisimen marapattaldy.
