Aqmolada habar-osharsyz ketken erli-zaıypty qarııalar astanadan tabyldy
KÓKShETAÝ. QazAqparat - Aqmola polıtseıleri aýyl turǵynynyń qart ata-anasyn izdep tapty, dep habarlaıdy QazAqparat.
Oblystyq polıtsııa departamenti taratqan málimetke sensek, Tselınograd aýdany polıtsııa bóliminiń kezekshi bólimine aýyldardyń biriniń 49 jastaǵy turǵynynan habar túsken.
Er adam bir kún buryn avtobýspen Nur-Sultan qalasynyń emhanasyna ketken 78 jáne 80 jastaǵy ata-anasyn izdeýge kómek kórsetýdi surady.
Ótinish berýshiniń aıtýynsha, ata-anasynda uıaly telefon bolmaǵan.
Joǵalǵan adamdardyń turatyn jerin anyqtaý maqsatynda polıtsııa qyzmetkerleri jedel izdestirý sharalaryn uıymdastyryp, qart adamdar týraly baǵdar joldady.
Іzdeý barysynda polıtsııa qyzmetkerleri aýlalardy aralap, saýda ortalyqtaryn, adamdar kóp jınalatyn oryndardy, táýlik boıy jumys isteıtin dúkenderdi, medıtsınalyq mekemelerdi tekserdi, qart erli-zaıyptylardy kórgen adamdar anyqtaldy.
Qabyldanǵan sharalardyń nátıjesinde zeınetkerler 26 tamyz shamamen saǵat 11.00-de elordadaǵy iri saýda ortalyqtarynyń birinen tabyldy.
Keıinirek qart erli-zaıyptylardyń ózderi aıtqandaı, olar qalada eski dostaryn kezdestirip, solardyń úıine qonaqqa barǵan.
Olar ýaqyttyń qalaı ótkenin baıqamaı, jaqyndaryna qaıda júrgenin eskertýdi umytyp ketken. Qazirgi ýaqytta zeınetkerler úıinde.
