Aqmolada erekshe kózge túsken oqýshylar «Jas ulan» qataryna qabyldandy
KÓKShETAÝ. QazAqparat - Kókshetaýdaǵy Aqmola oblystyq ólketaný murajaıynda erekshe kózge túsken oqýshylardy «Jas ulan» qataryna qabyldaý saltanatty rásimi ótti, dep habarlaıdy QazAqparat tilshisi.
Bıyl Qazaqstan Respýblıkasy Tuńǵysh Prezıdentiniń bastamasymen qurylǵan «Jas Ulan» balalar-jasóspirimder qozǵalysyna 10 jyl tolyp otyr.
«Jas ulan» óz qyzmetin jalpy bilim beretin mektepter bazasynda júzege asyrady.
Bul - óskeleń urpaqty joǵary adamgershilik-rýhanı qundylyqtar, toleranttylyq, demokratızm jáne ózara túsinistik mádenıeti negizinde qazaqstandyq patrıotızm rýhynda qalyptastyratyn uıym.
«Jas ulanda» músheliktiń eki deńgeıli júıesi jumys isteıdi.
«Jas ulan» - aǵa býyn músheleri 5-10 synyp oqýshylary, «Jas qyran» - kishi býyn músheleri.
Onyń qataryna óz erkimen nıet bildirgen, «Jas ulannyń» damýyna óz úlesin qosqysy keletin 1-4 synyp oqýshylary qabyldanady.
Búgin úzdik balalar, óz mektebiniń, qalasynyń jáne oblysynyń namysyn birneshe ret qorǵaǵan belsendiler atalǵan birlestiktiń qataryna endi.
Aqmola oblysynyń ákimi Ermek Marjyqpaev 10 oqýshyǵa galstýk baılady.
«Jas Ulan» balalar uıymy ózderiniń kóshbasshylyq qasıetterimen erekshelengen 500 myńnan astam aqmolalyq balalardy tárbıeledi. Sizderdi osy merekemen shyn júrekten quttyqtaımyn. Balalar uıymynda ótetin jyldaryńyz qyzyqty ári tanymdy bolsyn. Sizder Tuńǵysh Prezıdentimizdiń elimizdiń laıyqty azamattary bolsyn degen úmitin aqtaıtyn bolasyzdar dep senemin!» - dep atap ótti aımaq basshysy.
Aıta ketsek, kóptegen balalar, burynǵy jasulandyqtar kásibı mansapta joǵary bıikterge qol jetkizdi jáne qol jetkizgen jetistikterimen toqtap qalmady.
Mysaly, Nur-Sultan qalasyndaǵy oblystyq mektep-ınternatynyń túlegi Maǵjan Beksultan qazirgi tańda Qazaqstannyń eń iri kompanııalarynyń biri «Bi Group» kompanııasynda eńbek etedi.
Sadyq Medet Zerendi aýdanynyń Abaı mektebiniń túlegi, qazirgi ýaqytta Taraz qalasynyń 5513 áskerı bóliminde vzvodty basqarady, al oblystyq «Daryn» mektep-ınternatynyń túlegi Mánsııa Esekeeva qazirgi ýaqytta oblystyq jastar resýrstyq ortalyǵynyń dırektory qyzmetinde.
