Aqmolada elimizdegi eń iri qus fabrıkasy iske qosyldy

KÓKShETAÝ. QazAqparat - Aqmola oblysynda Indýstrııalandyrý kartasy aıasynda elimizdegi jáne Ortalyq Azııadaǵy eń iri qus fabrıkasy iske qosyldy, dep habarlaıdy QazAqparat tilshisi aýdan ákimdiginiń baspasóz qyzmetine silteme jasap.

Bulandy aýdanynda ashylǵan «Makınsk qus fabrıkasy» JShS jylyna 50 myń tonna qus etin óndirýge qaýqarly. Bul qýattylyǵy, tehnıkalyq jabdyqtalýy jáne ınvestorlardyń quramy jaǵynan biregeı joba. Investorlar arasynda «Aitas KZ» AQ, Eýropa qaıta qurý jáne damý banki, Baiterek Venture Fund venchýrlyq qory bar, al kredıtory - «Qazaqstan damý banki» AQ. 

Mańyzdy jobany júzege asyrý óńirde jańa jumys oryndaryn ashyp, óndiristi damytýǵa serpin beredi. Sonymen qatar, atalǵan joba Astana qalasy aınalasynda azyq-túlik beldeýin damytýǵa septigin tıgizbek.

Sharaǵa aımaq basshysy Málik Myrzalın, «Qazaqstan damý banki» AQ basqarma tóraǵasy Bolat Jámishev qatysyp, quttyqtaý sóz sóıledi.

«Bul - qus etin óndirýdegi elimizdegi eń iri jobalardyń biri. Jobany iske qosý jergilikti óndiristiń jáne qus etin jetkizip berý kólemin ulǵaıtýǵa múmkindik beredi», - dedi M.Myrzalın óz sózinde. 

Kásiporyn basshylarynyń aıtýynsha, bul jylyna 25 myń tonna qus etin óndirý jónindegi jobanyń alǵashqy kezeńi. Fabrıka keler jyly tolyq qýatyna shyǵady dep josparlanǵan. Sol kezde elimizdegi qus eti ımportynyń úshten bir bóligin jabady.