Aqmolada ekskavatorshynyń ólimine qatysty tekseris aıaqtaldy
KÓKShETAÝ. QazAqparat - «Altyntaý-Kókshetaý» JShS-de ekskavatorshynyń ólimine qatysty tekseris júrgizgen komıssııa jumys berýshiniń kinásin tolyqtaı anyqtady, dep habarlaıdy QazAqparat tilshisi Aqmola oblysy boıynsha ındýstrıaldy damý jáne ónerkásip qaýipsizdigi departamentine silteme jasap.
«Qaıǵyly oqıǵa oryn alǵan qaýipti óndiristik nysanda tekseris júrgizgen arnaıy komıssııa oqıǵanyń mán-jaıyn zerttep, kýágerler men eńbekti qorǵaý jáne qaýipsizdik talaptaryn saqtaýda jaýapty laýazymdy tulǵalardyń túsinktemelerin eskere kele, «Altyntaý Kókshetaý» JShS zardap shekken ekskavatorshynyń jumys ýaqytynda jumys ornynda, jumys berýshiniń tapsyrmasyn oryndap jatqanyn anyqtady. Sol sebepti, qaıǵyly oqıǵany óndirispen baılanysty dep esepteýge bolady, eńbek qyzmetine baılanysty qaıǵyly jaǵdaı dep akti toltyrý qajet.
Qaıǵyly jaǵdaıdyń sebebin anyqtaı otyryp, komıssııa jumys berýshiniń kinási-100 paıyz, jumysshynyki - 0 paıyz dep qorytyndy shyǵaryp otyr», - dep atap ótti vedomstvodaǵylar.
Departamenttiń deregi boıynsha, qutqarýshylar men órt sóndirýshiler qutqarý operatsııasy kezinde jedel, saýatty jáne joǵary kásibı deńgeıde qımyldap, sheshim shyǵarǵan. Keleńsiz jaǵdaıda kásibı sheberlik, erlik jáne tózimdilik kórsete bildi.
«Qutqarý sharalaryna qatysýshylar zardap shekken jumysshyny tez arada tas úıindisiniń astynan alyp shyǵý úshin barynsha shıraq qımyldady. Bul zardap shegýshini tirideı alyp shyqqan TMD elderinde buryn sońdy bolmaǵan teńdessiz qutqarý operatsııasy boldy. Qutqarý jumystary kezinde, qutqarýshylar shalys qımyldasa, ekskavatorshy sol jerde jantásilim etýi múmkin edi», - dep túsindirdi vedomstvodaǵylar.
Aıta keteıik, qazirgi kezde apatty arnaıy tergeý sharalary aıaqtaldy. Osynyń nátıjesinde jaýapty tulǵalar tártiptik jaýapkershlikke tartylady. Tergeý isteri belgilengen merzimde quqyq qorǵaý organdaryna joldanady.
Eske sala keteıik, 21 shilde kúni tańǵy saǵat 08:00-der shamasynda «Altyntaý-Kókshetaý» JShS ashyq kenishinde taý jynysyn qoparyp jatqan ekskavatordyń ústine tastar qulap, kabınany ishindegi 25 jastaǵy júrgizýshimen birge basyp qalǵan bolatyn.
Keıin er adam Aqmola oblystyq aýrýhnasyna jatqyzylyp, sonda kóz jumdy.
