Aqmolada bıýdjet qarajatyn jymqyrǵan aýdandyq mádenıet úıiniń dırektory sottaldy

NUR-SULTAN. QazAqparat – Aqmola oblysynda aýdandyq mádenıet úıiniń dırektory jemqorlyq úshin sottaldy, dep habarlaıdy QazAqparat.

Bul týraly QR Sybaılas jemqorlyqqa qarsy is-qımyl agenttiginiń Birinshi departamentiniń aǵa tergeýshisi Danııar Bekaıdarov aıtyp berdi.

«Aqmola oblysynyń Sybaılas jemqorlyqpen kúres qyzmeti «Esil aýdanynyń mádenıet úıi» MKQK dırektory A. Ábdiǵaparovaǵa qatysty bıýdjet qarajatyn jymqyrý faktisi boıynsha sotqa deıingi tergeýdi aıaqtady. Ol 888 myń teńgeden astam bıýdjet qarajatyn jymqyrdy degen kúdikke ilindi», - dedi aǵa tergeýshi agenttiktiń baspasóz ortalyǵynda ótken brıfıngte.

Onyń aıtýynsha, qarajat jymqyrý mádenıet úıinde jumys istemeıtin qyzmetkerlerge jalaqyny zańsyz aýdarý jolymen jasalǵan.

«2020 jyldyń 12 aqpanynda Esil aýdandyq sotynyń úkimimen A. Ábdiǵaparova kináli dep tanylyp, 2 jylǵa bas bostandyǵynan aıyryldy. Ol jazasyn qaýipsizdigi tómen túrmede óteıdi. Sonymen birge, áıel memlekettik qyzmette laýazymdy qyzmetpen aınalysý quqyǵynan aıyryldy», - dedi D. Bekaıdarov.