Aqmolada «Burymdy qyz» oblystyq baıqaýynyń júldegerleri anyqtaldy
KÓKShETAÝ. QazAqparat - Aqmola oblysynda 16-25 jas aralyǵyndaǵy 12 arýdyń qatysýymen «Burymdy qyz» oblystyq baıqaýy ótti, dep habarlaıdy QazAqparat tilshisi.
Aqmola oblysy mádenıet basqarmasy baspasóz qyzmetiniń málimetinshe, Kókshetaýda uıymdastyrylǵan baıqaýǵa oblystyń qalalary men aýdandarynda iriktelgen16-25 jas aralyǵyndaǵy 12 arý qatysyp, baq synady.
Uıymdastyrýshylardyń aıtýynsha, baıqaýdyń maqsaty - umyt bolýǵa aınalǵan ulttyq tól mádenıetimiz ben ónerimizdi qaıta tiriltip, salt-dástúrdi jańǵyrtý, ásirese qyz balalardyń jan dúnıesindegi kórkemdik talǵamyn qalyptastyrý arqyly ádilettikke, ınabattylyqqa, izettilikke tárbıeleý. Sondaı-aq aqyldy da ajarly, talantty, burymdy qyzdardy elge tanystyrý, eń shashy uzyn qyzdy anyqtaý, qazaq qyzyna tán, minez-qulyqty dáripteýdi kózdegen.
«Ejelgi zamannan beri burym - áıelderdiń áshekeıi sanaldy. Qazaq qyzdarynyń sulýlyǵyn shash uzyndyǵymen jáne shashtyń jibektiligimen shabyttanǵan aqyndar men kompozıtorlar ánmen jyrlaǵan. Qazaq halqynyń dástúrli qundylyqtaryn nasıhattaý, salt-dástúrlerdi jańǵyrtý, kórkemdik talǵamdy qalyptastyrý jáne mádenı deńgeıdi arttyrý jastardy tárbıeleýde mańyzdy», - dep bólisti Aqmola oblysy mádenıet basqarmasynyń basshysy Aıgúl Sábıtova.
Baıqaý úsh kezeńnen turdy. Birinshisinde qyzdar beıne slaıdtar arqyly ózderi jáne otbasy týraly aıtty.
Ekinshi – «Bilikti qyz» atalymynda qatysýshylar salt-dástúrlerge qatysty suraqtarǵa jaýap berip, maqal-mátelderdi jalǵastyrdy.
Úshinshi kezeńde «Qyz-eldiń kórki» baıqaýda ulttyq kıimde defıle kórsetti.
Qyzdardyń burymynyń uzyndyǵyn «Sholpysy ásem jarasyp belge» atalymynda anyqtady.
Baıqaý qorytyndysy boıynsha Jaqsy aýdanynan kelgen Sofııa Joldybaı Gran-prı ıegeri atandy. «Bilikti qyz» atalymy boıynsha Ereımentaý aýdanynan Dılnaz Álmaǵambetova, «Kórikti qyz» atalymynda Arshaly aýdanynan Arýjan Ǵalymjanova, «Symbatty qyz» atalymy boıynsha kókshetaýlyq Nurshyraq Baqytbek jeńiske jetti.
Jeńimpazdar dıplomdarmen jáne baǵaly syılyqtarmen marapattaldy.
