Aqmola oblysynda 230 gektar aýmaqty sharpyǵan birneshe órt sóndirildi
ASTANA. KAZINFORM — Aqmola oblysynda sońǵy táýlikte jalpy aýmaǵy 230 gektardan asatyn birneshe qurǵaq shóp órti oqshaýlanyp, tolyq sóndirildi.
Órt oshaqtary Atbasar aýdanyndaǵy Sochınskoe aýylynyń mańynda, Eńbek jáne Beıtoǵaı aýyldyq okrýgterinde, Aqkól aýdanyndaǵy Aqkól qalasynyń shetinde, Bozaıǵyr aýylynyń janynda, Tselınograd aýdanyndaǵy Qabanbaı batyr jáne Tasty aýyldarynyń mańynda, Jaqsy aýdanyndaǵy Taıpaq aýyly aýmaǵynda, sondaı-aq Qorǵaljyn aýdanyndaǵy Kenbıdaıyq aýylynyń tóńireginde tirkelgen.
Órtti sóndirýge Aqmola oblysy TJD kúshteri, «Qazáýequtqarý» AQ, jergilikti atqarýshy organdar, «Jasyl aımaq» RMK, sondaı-aq Sandyqtaý, Aqkól, Stepnogor, Krasnobor jáne Ereımentaý orman sharýashylyqtarynyń qyzmetkerleri jumyldyryldy.
Órttiń barlyq oshaǵy tolyqtaı sóndirildi. TJD málimetinshe, eldi mekenderge qaýip tónýine jol berilmegen.
Qutqarýshylar turǵyndarǵa órt qaýipsizdigi talaptaryn saqtap, qurǵaq shópti órteýge jol bermeý qajet ekenin eskertti. Tótenshe jaǵdaı týyndaǵan jaǵdaıda 101 nemese 112 nómirlerine habarlasý kerek.
Eske salaıyq, buǵan deıin 2026 jylǵy 1 tamyzda elimizdiń memlekettik orman qory aýmaǵynda 7 orman órti tirkelgenin habarlaǵan edik.
