Aqmolada boranda adasyp ketken malshy tabyldy, taǵy 4 adam izdestirilip jatyr
KÓKShETAÝ. QazAqparat - Aqmola oblysynyń Jaqsy aýdanynda boranda adasyp ketken malshy aman-saý tabyldy. Sondaı-aq, Shortandy jáne Esil aýdandarynda boranda dalaǵa shyǵyp ketken tórt adamǵa izdestirilip jatyr, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimetinshe, jeltoqsannyń 07-sinde saǵat 01:30 shamasynda qutqarýshylar men polıtsııa qyzmetkerleri Jaqsy aýdanynyń Parchevka kentinde malshyny izdeý sharalaryn qolǵa aldy.
«Belgili bolǵandaı, 1972 jyly týǵan er adam 6 jeltoqsanda saǵat 16:00-de mal izdeýge shyǵyp, qaıtyp oralmaǵan. Іzdestirý sharalaryna TJD jeke quramynan 2 qyzmetker jáne qarda júretin bir arnaıy tehnıka, aýdandyq polıtsııa bóliminen bir qyzmetker jumyldyryldy. Nátıjesinde saǵat 04:00 shamasynda malshy aman-esen tabyldy» deıdi vedomstvonyń baspasóz qyzmetindegiler.
Jaqsy aýdandyq TJB bastyǵy Manat Begalınniń sózinshe, malshy qutqarýshylar kóliginiń jaryǵyn kórip, ózi dybys bergen.
«Dalada aqtútek boran. Malshynyń áli quryǵan. Kómek der kezinde keldi »,- deıdi ol.
Sonymen qatar, qutqarýshylar Shortandy aýdanynda 39 jastaǵy er adamdy izdestirip jatyr.
Al, Esil aýdanynda traktormen daladan shóp ákelýge ketken úsh er adam boranda joǵalyp ketti. Olardy da izdestirý sharalary júrip jatyr.
Qutqarýshylar oblys turǵyndaryn borandy kúni jolǵa shyqpaýǵa shaqyrady.
Illıýstratsııalyq foto: restwell.ru
