Aqmolada bilim bólimi 4 myńnan asa qyzmetkerine jalaqy boıynsha bereshek bolyp qalǵan

ASTANA. KAZINFORM — Aqmola oblysy prokýratýrasynyń sharalarymen jumyskerlerge 178 mln teńge kóleminde jalaqy tólendi, dep habarlaıdy oblystyq prokýratýranyń baspasóz qyzmeti.

Oblys prokýratýrasy azamattardyń eńbek quqyqtaryn qorǵaý salasyndaǵy zańdylyqtyń jaı-kúıine turaqty túrde taldaý júrgizdi. 

— Osy jumys aıasynda Tselınograd aýdanynyń prokýratýrasy bilim bóliminiń 4472 qyzmetkerlerine 178 mln teńge kóleminde jalaqy bereshegin anyqtady. Qadaǵalaý aktisine sáıkes atalǵan qaryz tolyq óteldi, osylaısha jumyskerlerdiń 4472 konstıtýtsııalyq quqyǵy qorǵalady, — delingen prokýratýra taratqan aqparatta.

Vedomstvo málimetinshe, bul baǵyttaǵy jumystar jalǵasady.

Budan buryn Aqmola oblysynda sýmen jabdyqtaý jelilerin salýǵa zańsyz aktıvter esebinen 21,5 mlrd teńge bólingenin jazdyq.