Aqmolada bıznestiń jol kartasy boıynsha 15 myń jumys orny ashyldy
ASTANA. QazAqparat - Aqmola oblysynyń ákimi Málik Myrzalın 2018 jyldyń 9 aıy ishindegi aımaqtyń áleýmettik-ekonomıkalyq damýy týraly baıandady, dep habarlaıdy QazAqparat tilshisi.
«Aǵymdaǵy jyly barlyq negizgi áleýmettik-ekonomıkalyq kórsetkishter boıynsha ósýi úrdisi qamtamasyz etildi. Aqmola oblysynyń negizgi kapıtalyna salynǵan ınvestıtsııalar kólemi ótken jylmen salystyrǵanda 6,7%-ǵa kóterilip, 200 mlrd teńgeden asty. Olardyń ishinde naqty ónerkásip sektoryndaǵy kapıtaldyń shamamen 70%-y ıgerildi», - dedi Málik Myrzalın.
Sonymen qatar oblys ákimi óńirde «Bıznestiń jol kartasy» baǵdarlamasynyń iske asyrylýy jaıynda aıta kele: «Óńirimizde shaǵyn jáne orta bıznes belsendi damyp keledi. 800-den astam joba qoldaýǵa ıe boldy jáne jeti jyl boıy júzege asyrylǵan «Bıznestiń jol kartasy» memlekettik baǵdarlamasy arqasynda jyl basyn beri 15 myń jańa jumys orny ashyldy. Elbasynyń bes áleýmettik bastamasyn iske asyrý sheńberinde mıkrokredıtti qarjylandyrý 1,7 esege, shamamen 4 mlrd teńgege ulǵaıdy. Búgingi tańda 2 mlrd teńgeden astam somaǵa 630 mıkrokredıt berildi», - dedi ol.
Oblys basshysynyń aıtýynsha, «Nurly jer» baǵdarlamasy boıynsha aǵymdaǵy jyldyń 9 aıynda turǵyn úı qurylysyna salynǵan ınvestıtsııa kólemi 35% -ǵa ósti. 394 myń sharshy metr turǵyn úı nemese 3800 páter paıdalanýǵa berildi. 2019 jyly el táýelsizdigin alǵan beri alǵash ret 500 myń sharshy metrden astam turǵyn úı salý josparlanyp otyr, bul - 4,5 myń páter. Bolashaqta jyl saıynǵy ósim 380-400 páterdi quraıtyn bolady.
Budan bólek, M.Myrzalın aımaqtyń agroónerkásiptik keshenin damytý óńirlik ekonomıkanyń negizgi tiregi ekeni aıtyp ótti. Onyń sózinshe, aýa raıynyń qolaısyzdyǵyna qaramastan, bıylǵy jyly Aqmola oblysyndaǵy astyqtyń jalpy túsimi 5,6 mln tonnaǵa jetken, ortasha ónimdiligi gektaryna 13 tsentnerden aınaldy.
