Aqmolada bıznespen aınalysqan 10 sheneýnikke 636 myń teńgeden aıyppul salyndy
Aqmola oblysy boıynsha sybaılas jemqorlyqqa qarsy is-qımyl departamentiniń málimetinshe, sybaılas jemqorlyqqa qarsy zańnama memlekettik qyzmetshilerge kásipkerlik qyzmetpen aınalysýǵa tyıym salady.
Alaıda, óńirde bul talapty bári birdeı saqtaı bermeıdi.
«Óńirdiń sybaılas jemqorlyqqa qarsy qyzmeti júrgizgen monıtorıng barysynda 10 memlekettik qyzmetshide jáne olarǵa teńestirilgen tulǵalarda jeke kásipker mártebesi bar ekeni belgili boldy. Onyń 50 paıyzy - basshylar. Barlyq ákimshilik materıaldar boıynsha sot aıyppul saldy», - dedi vedomstvodan.
Anyqtalǵandaı, oblystyń jergilikti atqarýshy organdarynyń biriniń qyzmetkeri memlekettik qyzmetshi bola otyryp, salyq organdarynda jeke kásipker retinde tirkelgen.
Sóıtip ol Ákimshilik quqyqbuzýshylyq kodeksiniń 154-baby baby boıynsha zańbuzýshylyq jasaǵan.
Sol sebepti laýazymdy tulǵaǵa 200 aılyq eseptik kórsetkish mólsherinde ákimshilik aıyppul salyndy.
Sondaı-aq, «Sybaılas jemqorlyqqa qarsy is-qımyl týraly» zańnyń 11-babyna sáıkes memlekettik laýazymǵa ne memlekettik nemese oǵan teńestirilgen fýnktsııalardy oryndaıtyn laýazymǵa úmitker tulǵalar aktıvteri men mindettemeleri týraly deklaratsııany mindetti túrde tapsyrady.
Alaıda, monıtorıngte belgilengendeı, oblystyń jergilikti atqarýshy organdarynyń 4 basshysy zańnamany buza otyryp, tulǵalardan tıisti deklaratsııany qabyldamaı, olardy laýazymǵa taǵaıyndaǵan.
«Memlekettik organ basshylary Ákimshilik quqyqbuzýshylyq kodeksiniń 680-babyna sáıkes sybaılas jemqorlyqqa qarsy is-qımyl boıynsha sharalar qabyldamaǵany úshin «memlekettik organdar basshylarynyń sybaılas jemqorlyqqa qarsy is-qımyl jónindegi sharalardy qabyldamaýy» 100 aılyq eseptik kórsetkish mólsherinde aıyppul túrinde ákimshilik jazaǵa tartyldy», - dep tolyqtyrdy vedomstvodan.
Aıta ketsek, Qosshyda elektr nysandaryn salý kezinde 222 mıllıon teńge jymqyrylǵan bolatyn.
