Aqmolada Birjan sal aýdanynyń 90 jyldyǵy toılandy
KÓKShETAÝ. QazAqparat - Aqmola oblysynda Birjan sal aýdanynyń 90 jyldyǵy atalyp ótti, dep habarlaıdy QazAqparat tilshisi.
Eske sala ketsek, QR Prezıdenti N.Nazarbaevtyń 2017 jylǵy 13 jeltoqsandaǵy, ıaǵnı Táýelsizdik merekesi qarsańyndaǵy Jarlyǵymen Eńbekshilder aýdanynyń ataýy Birjan sal aýdany dep ózgertilgen bolatyn.
Birjan sal atyndaǵy mádenıet saraıyndaǵy saltanatty májilis «Birjan sal eli» fılminiń tusaýkeserimen bastaldy. Keń kólemdi týyndynyń shyǵarmashylyq ujymy (stsenarıin jazǵan Muratbek Ospanov) aýdannyń 90 jyldyq tarıhynan taratyp bes taraýlyq týyndyny usynyp otyr.
Sharada Aqmola oblysynyń ákimi Málik Myrzalınniń quttyqtaýyn jetkizgen óńir basshysynyń orynbasary Qanat Ydyrysov aýdannyń áleýmettik-ekonomıkalyq damý barysyndaǵy jetistikteri el abyroıyn kóterýge septesip jatqandyǵyn atap ótti.
«Tarıhı tulǵalar tárbıelegen Birjan sal eli qazaq mádenıetiniń shamshyraǵy bolýmen qatar, Elbasynyń strategııalyq baǵyttaryn júzege asyrýda ónege tanyta beretindigin dáleldeýde. Munda zamanalyq agrokeshen qurylyp, ındýstrııalyq-ınnovatsııalyq úrdis maqsatkerlik sıpatqa ıe. Memleket basshysy N.Nazarbaevtyń «Órken-Atansor» temir kenishin, «KazBeef LTD» ozyq úlgidegi iri qara bordaqylaý keshenin ashýy óńirdiń áleýetin kórsetedi», deı kele, Qanat Muratuly aýdannyń bir top turǵynyna oblys ákiminiń Alǵys hatyn tapsyrdy.
Sonymen qatar, aýdan ákimi Ermek Nuǵymanov ta jurtshylyqty tolaǵaı toımen quttyqtap, eldiń órkendeýine salmaqty úles qosqan azamattardy arnaıy daıyndalǵan merekelik medaldarmen marapattady.
Saltanatty shara mádenı jáne ulttyq sport túrleri boıynsha uıymdastyrylǵan baǵdarlamaǵa ulasty.
