Aqmolada bir táýliktiń ishinde 40 adam sýdan qutqaryldy
KÓKShETAÝ. QazAqparat - Aqmola oblysynyń Býrabaı jáne Zerendi aýdandarynda bir táýliktiń ishinde 40 adam sýdan qutqaryldy, onyń 10 - bala, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimetinshe, shildeniń 6-da Býrabaı jáne Zerendi aýdandarynyń kýrortty aımaqtarynda 40 adam sýdan qutqarylǵan.
«Býrabaı kólinde demalyp jatqan 35 adam (onyń ishinde 10 bala) qutqaryldy. Oqıǵa adamdar barjamen júzip júrgende oryn alǵan. Jaǵadan alystap ketken elektr qozǵaltqyshty barjanyń akkýmýlıatory otyryp qaldy. Sondyqtan, demalýshylar óz kúshterimen jaǵaǵa shyǵa almady. Sol kezde, jańbyr jaýyp, qatty jel turǵan. Ekpindi tolqynnan barja shaıqalyp, adamdardyń sýǵa ketý qaýpi týdy», deıdi vedomstvodan.
Demalýshylar saǵat 19.30 shamasynda «112» nómirine qońyraý shalǵan. Arada birer mınýt ótkende oqıǵa ornyna qutqarýshylar da kelip jetken.
«Jedel sharalar kezinde 35 adamnyń barlyǵy qutqarylyp, jaǵa jetkizildi», dep tolyqtyrdy vedomstvonyń baspasóz hatshysy Dınara Esenbaeva.
Sol kúni Zerendi kólinde úrlemeli matraspen júzý kezinde jaǵadan alystap ketken 5 adam qutqarylǵan.
